सम्राट चौधरी भाजपाचे बिहारमधील पहिले मुख्यमंत्री, उद्या सकाळी शपथविधी
पटना, दि. १४ : बिहारच्या राजकारणात ऐतिहासिक बदल घडला असून भाजपने प्रथमच मुख्यमंत्रीपद मिळवले आहे. पक्षाने सम्राट चौधरी यांची सर्वानुमते निवड केली असून ते भाजपचे बिहारमधील पहिले मुख्यमंत्री ठरणार आहेत. उद्या (१५ एप्रिल) रोजी सकाळी ११ वाजता पटना येथे त्यांच्या शपथविधीचा सोहळा होणार आहे. नितीश कुमार यांनी मुख्यमंत्रीपदाचा राजीनामा देऊन राज्यसभा गाठल्याने रिक्त झालेल्या पदावर भाजपने स्वतंत्रपणे दावा केला. भाजपकडे ८९ आमदार असल्याने त्यांचा दावा मजबूत होता आणि अखेर सम्राट चौधरी यांची निवड निश्चित झाली.
भाजप विधिमंडळ पक्षाचे नेते म्हणून निवड झाल्यावर सम्राट चौधरी म्हणाले,
भाजपने मला काम करण्याची संधी दिली. मी सांगू शकतो की मी जवळपास ३० वर्षांपासून राजकीय पदावर काम करत आहे. सुरुवातीला या पक्षात माझी कोणतीही विचारधारा नव्हती. जेव्हा मी पंतप्रधान मोदींच्या विचारांवर आधारित या पक्षात सामील झालो, तेव्हापासून मी २०१५ च्या निवडणुकांपासून भाजपसाठी सातत्याने काम करत आहे. मला राज्य पक्षाचा अधिकारी म्हणून, विधिमंडळ पक्षात, विधान परिषदेचा नेता म्हणून आणि संघटनेतील सर्वोच्च पद असलेल्या पक्षाचा प्रदेशाध्यक्ष म्हणून काम करण्याची संधी मिळाली. आज मी तुम्हाला खात्री देतो की, आम्ही पंतप्रधान मोदी, गृहमंत्री, शिवराज सिंह चौहान आणि भाजपच्या विचारधारेचे पालन करत राहू. आम्ही सर्वप्रथम भारताचा विचार करू आणि पक्षाला अग्रस्थानी ठेवू. नितीश कुमार यांनी मला खूप काही शिकवले आहे… ज्याप्रमाणे नितीश कुमार यांनी समृद्ध बिहारचे स्वप्न पाहिले आहे, त्याचप्रमाणे आम्ही सर्वजण मिळून बिहार आणि देशाला समृद्ध करण्यासाठी काम करू
सम्राट चौधरी यांचा राजकीय प्रवास १९९० च्या दशकात राष्ट्रीय जनता दलातून सुरू झाला. त्यांनी विविध मंत्रीपदे भूषवली असून अलीकडेच भाजपचे राज्याध्यक्ष व उपमुख्यमंत्री म्हणून काम केले. ते कुशवाहा समाजाचे प्रमुख OBC नेते मानले जातात, ज्यामुळे भाजपला सामाजिक समीकरणात बळ मिळाले आहे. ही निवड बिहारच्या राजकारणात नवीन समीकरणे निर्माण करणारी ठरली आहे. भाजपसाठी हा विस्ताराचा टप्पा असून सम्राट चौधरी यांची मुख्यमंत्रीपदी निवड पक्षाच्या इतिहासात महत्त्वपूर्ण नोंद ठरणार आहे.
SL/ML/SL
