लाडकी बहिण योजनेच्या १० लाख लाभार्थी ठरल्या अपात्र
मुंबई, दि. ११ : ‘मुख्यमंत्री माझी लाडकी बहीण योजना’ आता अडचणीत सापडली आहे. राज्य सरकारने केलेल्या तपासणीत असे समोर आले आहे की, सुमारे ८ लाख ८५ हजार महिलांनी या योजनेअंतर्गत त्यांच्या पात्रतेपेक्षा जास्त रोख रक्कम घेतली आहे. तसेच, २,००० हून अधिक सरकारी कर्मचाऱ्यांची नावेही लाभार्थी यादीतून नियमांचे उल्लंघन केल्यामुळे वगळण्यात आली आहेत. राज्य सरकारने ‘लाडकी बहीण’ लाभार्थ्यांचा डेटाबेस आयकर पॅन (Permanent Account Number) डेटाशी जोडण्यासाठी केंद्र सरकारची मंजुरी मिळवली आहे आणि तसा प्रस्तावही केंद्र सरकारला पाठवला आहे. याव्यतिरिक्त, चारचाकी वाहने असलेल्या अपात्र लाभार्थ्यांना वगळण्यासाठी वाहन मालकी डेटाचीही पडताळणी केली जाईल.
दरम्यान उपमुख्यमंत्री आणि अर्थमंत्री अजित पवार यांनी कबूल केले की, ही योजना महिलांपर्यंत पोहोचवण्यापूर्वी अधिकाऱ्यांनी योग्य पडताळणी केली नव्हती. “जेव्हा ही योजना सुरू करण्यात आली, तेव्हा आमच्याकडे खूप कमी वेळ होता. निवडणुकांना फक्त दोन ते तीन महिने उरले होते,” असे ते म्हणाले.
शिवसेना (उबाठा) पक्षाचे ज्येष्ठ नेते संजय राऊत यांनी याला फसवणूक म्हटले असून, पवारांच्या राजीनाम्याची मागणी केली आहे. राज्यसभा खासदार राऊत म्हणाले, “तुम्ही (अजित पवार) राजीनामा दिलाच पाहिजे. अर्थ विभागात हा घोटाळा आहे. तुमच्या देखरेखेखाली राज्याच्या तिजोरीतील पैसा लुटण्यात आला आहे.” त्यांनी असेही आरोप केले की, पुरुषांनीही महिलांसाठी असलेल्या या योजनेचा लाभ आपले नाव बदलून घेतला आहे.
