Gold Loan बाबत RBI चा मोठा निर्णय
मुंबई, दि . ९ : RBI ने आपल्या अलीकडच्या MPC बैठकीत गोल्ड लोनच्या संबंधित नियमांमध्ये अनेक महत्त्वाचे बदल केले आहेत. यानंतर आता सर्वसामान्यांना सहज गोल्ड लोन मिळू शकेल, कागदपत्रांची आवश्यकता कमी होईल आणि तुम्ही कर्ज फेडले तर तुम्हाला तुमचे सोने लवकर परत मिळेल. पुढील वर्षी 1 एप्रिल 2026 पासून गोल्ड लोनचे नियम लागू होतील. ग्राहकांना आता सोने आणि चांदी गहाण ठेवण्याची मर्यादाही घालून देण्यात आली आहे. याशिवाय बँकेच्या चुकीमुळे तारण ठेवलेले सोने किंवा चांदी हरवले किंवा खराब झाले तर ग्राहकाला पूर्ण भरपाई दिली जाईल. ग्राहक कर्ज फेडू शकला नाही आणि बँक सोन्याचा लिलाव करत असेल, तर लिलावापूर्वी नोटीस द्यावी लागेल.
गहाण ठेवण्याची मर्यादा
सोन्याचे दागिने: 1 किलो
सोन्याचे नाणे: 50 ग्रॅम
चांदीचे दागिने: 10 किलो
चांदीची नाणी: 500 ग्रॅम
6 जून रोजी प्रसिद्ध नवीन फ्रेमवर्कचा उद्देश ग्राहकांना अधिक सुविधा प्रदान करणे आणि कर्ज देणाऱ्या संस्थांवर देखरेख आणि कडकपणा वाढवण्याचा असून हे नवीन नियम सर्व व्यावसायिक बँका, NBFC, सहकारी बँका आणि गृहनिर्माण वित्त कंपन्यांना लागू होतील. कर्जाच्या अटी आणि मूल्यांकन ग्राहकाच्या स्थानिक भाषेत दिले जाईल. ग्राहक निरक्षर असल्यास त्याला साक्षीदाराच्या उपस्थितीत माहिती दिली जाईल.
आता ग्राहक सोन्याच्या किमतीच्या 85% पर्यंत कर्ज घेऊ शकतील, जे याआधी 75 टक्के होते. हा नियम 2.5 लाख रुपयांपर्यंतच्या कर्जांना लागू होईल. म्हणजे तुमच्याकडे 1 लाख रुपयांचे सोने असेल तर, तुम्ही आता 85,000 रुपयांपर्यंत कर्ज घेऊ शकाल.
आता कर्ज बंद केल्यानंतर त्याच दिवशी किंवा जास्तीत जास्त 7 कामकाजाच्या दिवसांत सोने किंवा चांदी परत करणे आवश्यक असेल. तसेच विलंब झाल्यास बँकेला प्रत्येक दिवसासाठी ग्राहकांना 5000 रुपये भरपाई द्यावी लागेल.
वरील मर्यादेत कर्ज घेणाऱ्यांना आता उत्पन्नाचा दाखला किंवा क्रेडिट स्कोअर तपासण्याची आवश्यकता राहणार नाही. यामुळे ग्रामीण आणि कमी उत्पन्न गटातील लोकांना सहज कर्ज मिळू शकेल.
