समृद्धी महामार्गावर आता लुटपाटीचे प्रयत्न….
वाशिम, दि. 18 (एमएमसी न्यूज नेटवर्क): वाशिम जिल्ह्यातून जाणाऱ्या समृद्धी महामार्गावर कारंजा जवळ काल मध्यरात्रीच्या सुमारास नागपूरहून मुंबईच्या दिशेने जाणाऱ्या विदर्भ ट्रॅव्हल्सच्या बसवर दगडफेक करून लुटण्याचा प्रयत्न झाला. या दगडफेकीत बसमधील पाच ते सात प्रवासी गंभीर जखमी झाल्याची माहिती आहे.
समृद्धी महामार्गावर होणारे अपघात ही आता नित्याचीच बाब झालेली असताना त्यात आता चोरीच्या घटनाही मोठ्या प्रमाणात उघडकीस येत आहेत. बुलडाणा जिल्ह्यात डिझेल चोरीचा प्रकार समोर आल्यानंतर आता वाशिम जिल्ह्यात विदर्भ ट्रॅव्हल्सच्या खाजगी बसला चोरट्यांनी लुटण्याचा प्रयत्न केला आहे. काल रात्री नागपूरहून मुंबईला जाणाऱ्या विदर्भ ट्रॅव्हल्सची बस कारंजा जवळील ढाकली किनखेड या परिसरात आलेली असताना चोरट्यांनी या बसवर दगडफेक केली.
त्यात बसच्या काचा फुटून मोठे नुकसान झाले सोबतच बसमधील प्रवासी सुद्धा जखमी झाले आहेत. बसवर दगडफेक झालेली असताना चालकाने बस न थांबवता पुढे ती कारंजा टोल नाक्यापर्यंत आणली. चालकांनी दाखवलेल्या या समय सूचकतेमुळे मोठा अनर्थ टळला आहे. या दगडफेकीत दयाराम राठोड रा.चिखली, तालुका दारव्हा, जिल्हा यवतमाळ हे गंभीर जखमी झाले असून त्यांच्यावर प्राथमिक उपचार करून त्यांना यवतमाळ येथे पुढील उपचारासाठी पाठवण्यात आले आहे, तर इतर पाच ते सहा प्रवासी सुद्धा जखमी झाल्याची माहिती आहे. यासंदर्भात कारंजा ग्रामीण पोलिसात तक्रार देण्यात आली असून पोलीस पुढील तपास करत आहेत. Robbery attempts on Samriddhi Highway now….
ML/KA/PGB
18 Jun 2023
