महिला प्रवाशांसाठी एसटीची ‘जागा दाखवा’ मोहीम..!
मुंबई, दि. 18 (एमएमसी न्यूज नेटवर्क) : एसटी महामंडळाला कोरोना काळात मोठे आर्थिक नुकसान झाले होते. त्यातच संप लांबल्याने देखील हंगाम वाया गेल्या एसटीची अवस्था अधिकच वाईट झाली होती. परंतू सरकारने आधी ज्येष्ठ नागरिकांसाठी अमृत योजना आणल्याने 75 वर्षांवरील नागरिकांना मोफत सवलतीचा फायदा झाला. त्यानंतर महिलांना अर्ध्या तिकीटात प्रवास योजनेमुळे एसटीपासून दूर गेलेले प्रवासी पुन्हा एसटीतून प्रवास करु लागले. सध्या दररोज एसटीने 50 लाख प्रवासी प्रवास करतात. तसेच सवलतीची भरपाई सरकार निधी देऊन करीत असल्याने एसटीचे उत्पन्न वाढले आहे.
राज्य सरकारने महिलांसाठी एसटीच्या बसमध्ये तिकीट दरामध्ये 50% सवलत दिली आहे. सध्या एसटीमध्ये महिला सन्मान योजना अंतर्गत लाखो महिला दररोज एसटीतून अर्ध्या तिकीट दरात प्रवास करीत आहेत. परंतु केवळ महिलांना तिकीट दरात सवलत देऊन चालणार नाही, तर योजनेच्या नावाप्रमाणे त्यांचा ‘सन्मान’ देखील केला पाहिजे! या हेतूने अक्षरा केंद्र या सामाजिक संस्थेच्या सहकार्याने एसटीने ‘जागा दाखवा’ हा प्रबोधनात्मक संदेश सर्व प्रवाशांपर्यंत पोहोचवण्याचा आणि त्यातून जनजागृती करण्याचा उपक्रम राबविण्याचे ठरविले आहे. त्यानुसार प्रत्येक बसस्थानकावर, समाजमाध्यमाच्याद्वारे एसटीतून प्रवास करणाऱ्या प्रवाशांना एसटीच्या कर्मचाऱ्यांना विविध चित्रफिती द्वारे महिलांचा प्रवासादरम्यान सन्मान करावा असा प्रभोधनात्मक संदेश दिला जाणार आहे.
PGB/ML/PGB
18 Aug 2024
