या आहेत आंतरराष्ट्रीय ऑलिंपिक समितीच्या पहिल्या महिला अध्यक्ष
लॉसेन, दि. २२ (एमएमसी न्यूज नेटवर्क) : झिम्बाब्वेच्या क्रीडा मंत्री क्रिस्टी कोव्हेंट्री यांची आंतरराष्ट्रीय ऑलिंपिक समितीच्या (IOC) १० व्या अध्यक्ष म्हणून निवड झाली आहे. हे पद भूषवणाऱ्या त्या पहिल्या महिला आणि पहिल्या आफ्रिकन व्यक्ती आहेत. कोव्हेंट्री यांनी जलतरणात दोन वेळा ऑलिंपिक सुवर्णपदक जिंकले आहे. . ४१ वर्षीय कोव्हेंट्री २३ जून २०२५ रोजी औपचारिकपणे विद्यमान अध्यक्ष थॉमस बाख यांची जागा घेतील. त्यांचा कार्यकाळ ८ वर्षांचा असेल.क्रिस्टी कोव्हेंट्री या जगातील सर्वात महान बॅकस्ट्रोक जलतरणपटूंपैकी एक मानल्या जातात.
क्रिस्टी कोव्हेंट्री या झिम्बाब्वेच्या सर्वात यशस्वी ऑलिंपिक खेळाडू आहे. त्यांनी ५ ऑलिंपिक खेळांमध्ये (२०००, २००४, २००८, २०१२ आणि २०१६) भाग घेतला आहे आणि एकूण ७ पदके जिंकली आहेत. सर्व सात पदके फक्त दोन ऑलिंपिकमध्ये मिळाली आहेत – अथेन्स ऑलिंपिक आणि बीजिंग ऑलिंपिक. २००४ च्या अथेन्स ऑलिंपिक आणि २००८ च्या बीजिंग ऑलिंपिकमध्ये त्यांनी एकूण ७ ऑलिंपिक पदके जिंकली, ज्यात २ सुवर्ण, ४ रौप्य आणि १ कांस्य पदक होते. २००८ च्या बीजिंग ऑलिंपिकमध्ये त्यांनी २०० मीटर बॅकस्ट्रोकमध्ये विश्वविक्रमही केला.
२०१३ मध्ये क्रिस्टी कोव्हेंट्री आंतरराष्ट्रीय ऑलिंपिक समिती (IOC) च्या सदस्य झाल्या. त्यानंतर निवृत्तीनंतर, २०१८ मध्ये, झिम्बाब्वे सरकारने त्यांना क्रीडा, कला आणि मनोरंजन मंत्री बनवले. त्या अजूनही या पदावर काम करत आहेत.
SL/ML/SL
22 March 2025
