अदानी समूहाने सुरु केला देशातील सर्वांत मोठा Green Hydrogen blending Program
अहमदाबाद, दि. ७ (एमएमसी न्यूज नेटवर्क) : अदानी समूहाने भारतातील सर्वात मोठा हायड्रोजन मिश्रण कार्यक्रम सुरू केला आहे. हा कार्यक्रम नैसर्गिक वायूमध्ये हायड्रोजन मिसळण्याचा आहे. समूहाने त्याची सुरुवात अहमदाबादपासून केली आहे. याअंतर्गत, कंपनीने घरांना स्वयंपाकासाठी पुरवल्या जाणाऱ्या नैसर्गिक वायूमध्ये ग्रीन हायड्रोजन मिसळण्यास सुरुवात केली आहे. उत्सर्जन कमी करणे आणि निव्वळ शून्य लक्ष्य गाठणे हे त्याचे उद्दिष्ट आहे.
अदानी टोटल गॅस लिमिटेड (Adani Total Gas Limited) ने अहमदाबादच्या शांतीग्राममध्ये पाईपद्वारे नैसर्गिक वायू पुरवठ्यामध्ये 2.2-2.3 टक्के ग्रीन हायड्रोजन मिसळण्यास सुरुवात केली आहे. कंपनीने लिंक्डइनवर ही माहिती दिली. अदानी टोटल गॅस लिमिटेड हा अदानी समूह आणि फ्रेंच ऊर्जा कंपनी टोटलएनर्जीज यांचा संयुक्त उपक्रम आहे.
सध्या सरकारी वीज कंपनी एनटीपीसी (NTPC) गुजरातमधील सुरत जिल्ह्यातील कावास येथील घरांना ग्रीन हायड्रोजन मिश्रित नैसर्गिक वायू पुरवते. सरकारी गॅस कंपनी गेल (इंडिया) लिमिटेड मध्य प्रदेशातील इंदूरमध्ये सीएनजी पुरवठ्यासाठी एक छोटा पथदर्शी प्रकल्पही चालवत आहे. त्यात ग्रे हायड्रोजनची भर पडली आहे. अदानी टोटल गॅस लिमिटेडचा हा आतापर्यंतचा सर्वात मोठा प्रकल्प आहे.
