छ. संभाजीनगर जिल्ह्यात जोरदार पाऊस , नदी नाल्यांना मोठा पूर…
छ. संभाजीनगर दि २ (एमएमसी न्यूज नेटवर्क) : रात्रभरापासून छ्त्रपती संभाजीनगर शहरासह जिल्ह्यात जोरदार पाऊस सुरू असून जिल्ह्यातील सिल्लोड, सोयगाव, कन्नड फुलंब्री, गंगापूर, खुलताबाद, वैजापूर आणि पैठण तालुक्यात जोरदार पाऊस पडत आहे. या पावसामुळे जिल्ह्यातील नदी नाल्यांना पूर आला आहे.
जिल्ह्यातील पूर्णा, गोदावरी, गिरजा, केळणा, अंजना , सोना , वाघूर, जुई सह इतर अनेक नद्यांना मोठ्या प्रमाणात पुर आला असून सिल्लोड तालुक्यातील हट्टी तसेच रहीमाबाद आसडी परिसरातील पुला वरून पाणी वाहत असल्याने या परिसरातील गावाचा संपर्क तुटला आहे.
कन्नड तालुक्यातील पिशोर येथील परिसरातील गोसावी वस्तीतील घरात मध्ये मोठ्या प्रमाणात पाणी शिरल्याने संसार उपयोगी वस्तूचे नुकसान झाले आहे. तसेच सिल्लोड तालुक्यातील रहीमाबाद येथील काही घरांमध्ये पाणी शिरले आहे. परिणामी घरातील साहित्याची वाताहत झाली आहे. दरम्यान पैठण येथील गोदावरी नदी काठ आणि नाथसागर परिसरातील नागरिकांना प्रशासनाच्या वतीने सतर्कतेचा ईशारा दिला आहे.
