भारताच्या या शेजारी देशात करता येणार UPI पेमेंट
नवी दिल्ली, दि. ११ (एमएमसी न्यूज नेटवर्क) : UPI हे आता भारतात सर्वसामान्य माणसाच्या दैनंदिन जगण्याचा भाग झाले आहे. भारतात दररोज लाखो लोक यूपीआय (UPI) द्वारे पेमेंट करतात. आता हळूहळू यूपीआय जगभर पोहोचत आहे. जगातील अनेक देशांमध्ये यूपीआय पेमेंट सुरू झाले आहे. यामध्ये श्रीलंका, फ्रान्स, मालदीव अशा अनेक देशांच्या नावांचा समावेश आहे. आता भारताचा शेजारील देश नेपाळमध्येही यूपीआयद्वारे ऑनलाइन पेमेंट करता येणार आहे.
नॅशनल पेमेंट कॉर्पोरेशन ऑफ इंडिया (NPCI) ने म्हटले की, आता भारतीय वापरकर्ते युनिफाइड पेमेंट इंटरफेस (UPI) द्वारे नेपाळमध्ये पेमेंट करू शकतात. याचा अर्थ नेपाळमध्ये प्रवास करणारे भारतीय त्यांच्या स्मार्टफोनवर यूपीआय ॲपद्वारे क्यूआर कोड आधारित ऑनलाइन पेमेंट करू शकतील. गेल्या वर्षी सप्टेंबरमध्ये, NPCI इंटरनॅशनल पेमेंट्स लिमिटेड (NIPL) आणि नेपाळमधील सर्वात मोठे पेमेंट नेटवर्क फोनपे पेमेंट सर्व्हिस (Fonepay Payment Service) यांच्यात एक करार झाला होता. या अंतर्गत नेपाळमध्ये यूपीआयद्वारे पेमेंट सुरू झाले आहे.
नॅशनल पेमेंट कॉर्पोरेशन ऑफ इंडियाने आपल्या निवेदनात म्हटले आहे की, पहिल्या टप्प्यातील भागीदारी केल्यानंतर भारतीय वापरकर्ते नेपाळमधील अनेक बिझनेस स्टोअर्समध्ये यूपीआयद्वारे ऑनलाइन खरेदी करण्यासाठी पेटीएम, फोनपे, गुगल पे आदी यूपीआय आधारित ॲप्स वापरून पेमेंट करू शकतात. एनआयपीएलचे मुख्य कार्यकारी अधिकारी रितेश शुक्ला म्हणाले की, या उपक्रमामुळे डिजिटल पेमेंट क्षेत्रामध्ये क्रांतिकारी बदल होणार आहेत. यामुळे दोन्ही देशांमधील संबंध अधिक दृढ होतील. या यूपीआय पेमेंटमुळे दोन्ही देशांमधील आर्थिक संबंध, व्यावसायिक आणि पर्यटनात लक्षणीय सुधारणा होईल. यामुळे आर्थिक समृद्धी आणि प्रगतीला चालना मिळेल. नेपाळ व्यतिरिक्त भारतीय यूपीआय सेवा सिंगापूर, कॅनडा, ओमान, सौदी अरेबिया आणि संयुक्त अरब अमिराती (UAE) सह अनेक देशांमध्ये उपलब्ध आहे.
SL/ML/SL
11 March 2024
