काँग्रेस नेते अधीर रंजन चौधरी लोकसभेतून निलंबित
नवी दिल्ली, दि. १० (एमएमसी न्यूज नेटवर्क) : लोकसभेत मोदी सरकारवर मांडण्यात आलेला अविश्वास प्रस्ताव विरोधकांच्या अनुपस्थितीत आवाजी मतदानाने फेटाळल्या नंतर काँग्रेसचे गटनेते अधीर रंजन चौधरी यांना सभागृहातून निलंबित करण्यात आले आहे.
लोकसभेत मणिपूर आणि देशातील इतर बाबी विचारात घेऊन विरोधकांनी मोदी सरकार वर अविश्वास प्रस्ताव दाखल केला होता. त्यावर गेले तीन दिवस वादळी चर्चा झाली , त्याला आज शेवटी पंतप्रधान नरेंद्र मोदी यांनी तेवढेच जोरदार उत्तर दिले.
या चर्चेत महत्त्वाचे विषय ठरले ते वेगळेच , त्यातील एक राहुल गांधी यांनी आपले भाषण संपल्यावर सभागृहातून बाहेर पडताना सत्ताधाऱ्यांना दिलेला फ्ल्याईंग किस आणि दुसरा काँग्रेस चे गटनेते अधीर रंजन चौधरी यांनी पंतप्रधान मोदी यांच्यावर केलेले वादग्रस्त वक्तव्य.
राहुल गांधी यांच्यावर कारवाई करण्याची मागणी भाजपाच्या महिला खासदारांनी लोकसभा अध्यक्षांकडे लेखी स्वरूपात केली तर चौधरी यांनी केलेल्या वक्तव्यावरून त्यांना थेट निलंबित करण्यात आले.
चौधरी हे वारंवार आक्षेपार्ह वक्तव्य करतात आणि सांगूनही त्यावर दिलगिरी व्यक्त करीत नाहीत असा ठपका संसदीय कार्य मंत्री प्रल्हाद जोशी यांनी त्यांना निलंबित करण्याच्या प्रस्तावात ठेवला आणि त्यांच्या वक्तव्याबद्दल त्यांचे हे प्रकरण हक्कभंग समितीकडे पाठवण्याचा निर्णय घ्यावा तोवर त्यांना निलंबित करण्यात यावे असा प्रस्ताव जोशी यांनी सभागृहात मांडला. विरोधक सभागृहातून सभात्याग करून बाहेर पडले होते , त्यामुळे हा प्रस्ताव आवाजी मतदानाने मंजूर करण्यात आला. त्यापूर्वी अविश्वास प्रस्ताव देखील आवाजी मतदानाने फेटाळला गेला.
ML/KA/SL
10 Aug 2023
