U-19 भारतीय महिला संघ सलग दुसऱ्यांदा टी-20 विश्वविजेता
क्वालालंपूर, दि. २ (एमएमसी न्यूज नेटवर्क) : येथे आज भारतीय महिला क्रिकेट संघाने ICC U-19 टी 20 वर्ल्ड कप 2025 स्पर्धेत इतिहास घडवला आहे. टीम इंडियाने दक्षिण आफ्रिकेचा अंतिम सामन्यात 9 विकेट्सने धुव्वा उडवत एकूण आणि सलग दुसरा U 19 महिला विश्वचषक जिंकण्याचा पराक्रम केला आहे. दक्षिण आफ्रिकेने टीम इंडियाला विजयासाठी 83 धावांचं आव्हान दिलं होतं. टीम इंडियाने हे आव्हान 1 विकेट गमावून 11.2 ओव्हरमध्ये पूर्ण केलं. टीम इंडियाने या वर्ल्ड कप विजयासह नववर्षातील अप्रतिम सुरुवात केलीय. सलग दुसऱ्या वर्ल्ड कप विजयानंतर टीम इंडियाच्या अंडर 19 वूमन्स टीमचं सोशल मीडियावर अभिनंदन केलं जात आहे. टीम इंडियाने याआधी 2023 साली शफाली वर्मा हीच्या नेतृत्वात पहिलावहिला अंडर 19 वर्ल्ड कप जिंकला होता.
उपकर्णधार मुंबईकर सानिका चाळके हीने विजयी चौकार मारत टीम इंडियाला विजयी केलं. सानिका आणि गोंगाडी त्रिशा या दोघींनी दुसऱ्या विकेटसाठी नाबाद 48 धावांची विजयी भागीदारी केली. गोंगाडी त्रिशा हीने 13 चेंडूंमध्ये सर्वाधिक 44 धावांची नाबाद खेळी केली. त्रिशाच्या या खेळीत 8 चौकारांचा समावेश होता. तर सानिकाने 4 चौकारांसह नाबाद 26 धावांची विजयी खेळी साकराली. तर त्याआधी जी कामालिनी हीने 8 धावा केल्या. दक्षिण आफ्रिकेची कर्णधार कायला रेनेके हीने जी कामालिनी हीला आऊट करत एकमेव विकेट घेतली.
त्याआधी दक्षिण आफ्रिकेने टॉस जिंकून बॅटिंगचा निर्णय घेतला. मात्र भारतीय गोलंदाजांसमोर दक्षिण आफ्रिकेच्या गोलंदाजांनी गुडघे टेकले. दक्षिण आफ्रिकेच्या मोजून फक्त चौघींनाच दुहेरी आकडा गाठता आला. टीम इंडियाने दक्षिण आफ्रिकेला 20 ओव्हरमध्ये 82 धावांवर गुंडाळलं. टीम इंडियाकडून गोंगाडी त्रिशा हीने सर्वाधिक 3 विकेट्स घेतल्या. तर पारुनिका सिसोदीया, आयुषी शुक्ला आणि वैष्णवी शर्मा या तिघींनी प्रत्येकी 2-2 विकेट्स मिळवल्या. तर शबनम शकील हीने 1 विकेट घेत इतरांना चांगली साथ दिली.
SL/ML/SL
2 Feb. 2025
