‘बारावी फेल’ ने केली सिल्वर ज्युबिली, बॉलीवूडमध्ये झाला रेकॉर्ड
मुंबई, दि. १२ (एमएमसी न्यूज नेटवर्क) : विक्रांत मेस्सीच्या 12th Fail या चित्रपटाने गेल्या २३ वर्षात बॉलिवूडमधील कोणत्याही चित्रपटाला जमली नाही अशी विक्रमी कामगिरी करून दाखवली आहे. विधू विनोद चोप्रा दिग्दर्शित या चित्रपटाने थिएटरमध्ये एकूण २५ आठवड्यांचा टप्पा गाठला आहे, आज १२ एप्रिल रोजी हा चित्रपट सिल्व्हर ज्युबिली साजरी करत आहेत. विशेष म्हणजे गेल्यावर्षी २७ ऑक्टोबर रोजी प्रदर्शित झाला होता, त्यानंतर हा सिनेमा गेल्यावर्षी २९ डिसेंबर रोजी OTT प्लॅटफॉर्म डिज्नी प्लस हॉटस्टारवरही प्रदर्शित झाला आहे. तरीही थिएटरमध्ये प्रेक्षकांनी गर्दी केल्याने सिल्व्हर ज्युबिलीचा टप्पा गाठता आला आहे. सोशल मीडियावर विक्रांत आणि संपूर्ण टीमवर शुभेच्छांचा वर्षाव होतो आहे.यापूर्वी गदर या चित्रपटाने सिल्व्हर ज्युबिली होण्याचा मान पटकावला होता.
सिनेमाच्या टीमकडून जे पोस्टर शेअर करण्यात आले आहे त्यावर लिहिलेले ‘हार नहीं मानूंगा’ हे शब्द या परिस्थितीला अगदीच चपखल बसले आहेत. सिनेमा जेव्हा प्रदर्शित झाला तेव्हा अनेक आघाडीच्या सिनेमांचे आव्हान ‘ट्वेल्थ फेल’ समोर होते. त्यानंतरही बड्या स्टारचे चित्रपट प्रदर्शित झाले, मात्र असे असले तरीही २५ आठवडे हा चित्रपट टिकून आहे.
विधू विनोद चोप्रा फिल्म्स या अकाउंटवरुन या सिल्व्हर ज्युबिलीच्या पोस्टमध्ये असे लिहिले आहे की, ‘२५ आठवडे अत्यंत प्रभावशालीपणे थिएटरमध्ये राहत ट्वेल्थ फेल सिल्व्हर ज्युबिली साजरी करत आहे.’ तर विक्रांतने पोस्ट शेअर करत असे म्हटले की, ‘गेल्या २३ वर्षात हा मैलाचा दगड गाठणारा पहिलाच सिनेमा. प्रेक्षकांचे आभार ज्यांनी आमचे स्वप्न सत्यात उतरवले. हे घडणं तुमच्यामुळेच शक्य झाले. खूप प्रेम’. अभिनेत्याने नमस्कार आणि हार्ट इमोजी वापरत प्रेक्षकांप्रति प्रेम व्यक्त केले आहे.
विक्रांतने जो २३ वर्षांचा उल्लेख केला आहे तो ‘गदर’ या सिनेमासंदर्भात आहे. २३ वर्षांपूर्वी २००१ साली प्रदर्शित झालेल्या या सनी देओल-अमिषा पटेल स्टारर सिनेमाने सिल्व्हर ज्युबिलीचा टप्पा गाठलेला. त्यानंतर ‘ट्वेल्थ फेल’ने हा मान पटकावला.
SL/ML/SL
12 April 2024
