सामाजिक न्याय विभागाचे पुरस्कारांसाठी अर्ज करण्याची सुवर्णसंधी

मुंबई, दि. 7 (एमएमसी न्यूज नेटवर्क) :सामाजिक न्याय व विशेष सहाय्य विभागाच्या वतीने समाज कल्याण क्षेत्रात उल्लेखनीय कार्य करणाऱ्या नोंदणीकृत स्वयंसेवी संस्था आणि समाजसेवकांना दरवर्षी विविध पुरस्कारांनी सन्मानित केले जाते. सन २०२३-२४ या आर्थिक वर्षासाठी डॉ. बाबासाहेब आंबेडकर समाजभूषण पुरस्कार, साहित्यरत्न लोकशाहीर अण्णाभाऊ साठे पुरस्कार, पद्मश्री कर्मवीर दादासाहेब गायकवाड पुरस्कार, संत रविदास पुरस्कार, शाहू-फुले-आंबेडकर पारितोषिक आणि डॉ. बाबासाहेब आंबेडकर सामाजिक न्याय प्राविण्य पुरस्कार यासाठी अर्ज मागविण्यात येत आहेत.

समाज कल्याण क्षेत्रात कार्य करणाऱ्या इच्छुक संस्था व व्यक्तींनी १५ फेब्रुवारी पर्यंत आवश्यक कागदपत्रांसह संबंधित जिल्ह्याच्या समाज कल्याण सहायक आयुक्त कार्यालयात अर्ज सादर करावेत, असे आवाहन बाळासाहेब सोळंकी, प्रादेशिक उपायुक्त, समाज कल्याण मुंबई विभाग यांनी केले आहे.

डॉ. बाबासाहेब आंबेडकर समाजभूषण पुरस्कार – ५१ समाजसेवक आणि १० संस्था
साहित्यरत्न लोकशाहीर अण्णाभाऊ साठे पुरस्कार – २५ समाजसेवक आणि ६ संस्था
पद्मश्री कर्मवीर दादासाहेब गायकवाड पुरस्कार व संत रविदास पुरस्कार – प्रत्येकी १ व्यक्ती आणि १ संस्था
शाहू-फुले-आंबेडकर पारितोषिक – प्रत्येकी २ संस्थांना (एकूण १२ संस्था)
डॉ. बाबासाहेब आंबेडकर सामाजिक न्याय प्राविण्य पुरस्कार – प्रत्येकी ३ संस्थांना (एकूण १८ संस्था)
पुरस्कारांत धनादेश, सन्मानपत्र, स्मृतिचिन्ह, शाल आणि श्रीफळ यांचा समावेश आहे. अर्जदार संस्था किमान १० वर्षे समाज कल्याण क्षेत्रात कार्यरत असावी आणि त्यांच्यावर कोणताही फौजदारी गुन्हा दाखल नसावा.
अधिक माहिती आणि अर्जाचा नमुना
पुरस्कारांसाठी अर्जाचा नमुना व अधिक माहिती सामाजिक न्याय व विशेष सहाय्य विभागाच्या संकेतस्थळावर https://sjsa.maharashtra.gov.in उपलब्ध आहे.

ML/ML/PGB 7 Feb 2025