रामचरितमानस आणि पंचतंत्रचा समावेश आता जागतिक साहित्यकृतींमध्ये
मुंबई, दि. १५ (एमएमसी न्यूज नेटवर्क) : युनायटेड नेशन्स एज्युकेशनल, सायंटिफिक अँड कल्चरल ऑर्गनायझेशन (UNESCO) ने रामचरित मानस, पंचतंत्र आणि सह्रदयलोक-लोकन या ग्रंथांना जागतिक मान्यता दिली आहे. या साहित्यकृतींचा समावेश मेमरी ऑफ द वर्ल्ड एशिया-पॅसिफिक रिजनल रजिस्टर (MOWCAP) मध्ये करण्यात आला आहे. मेमरी ऑफ द वर्ल्ड (MoW) मध्ये जागतिक महत्त्व आणि सार्वत्रिक मूल्याच्या आधारावर आंतरराष्ट्रीय सल्लागार आणि कार्यकारी मंडळाने शिफारस केलेल्या दस्तऐवजांचा समावेश आहे. प्रादेशिक नोंदणीमध्ये समाविष्ट असलेली कागदपत्रे जागतिक स्तरावर ओळख मिळवण्यात मदत करतात. तसेच एका देशाची संस्कृती जगातील अनेक देशांमध्ये पोहोचते.
सांस्कृतिक मंत्रालयाने जारी केलेल्या निवेदनात म्हटले आहे की, रामचरितमानस, पंचतंत्र आणि सह्रदयलोक-लोकन यांसारख्या कार्यांचा भारतीय संस्कृती आणि साहित्यावर खोलवर प्रभाव पडला आहे. या साहित्यकृतींनी केवळ भारतावरच नव्हे तर भारताबाहेरील लोकांवरही खोल प्रभाव टाकला आहे. या कलाकृतींना युनेस्कोने मान्यता मिळणे ही भारताच्या समृद्ध सांस्कृतिक आणि साहित्यिक वारशासाठी अभिमानाची बाब आहे. तसेच या सन्मानामुळे भारतीय संस्कृतीच्या जतनाच्या दिशेने नवे पाऊल टाकण्यास मदत होणार आहे.
दिल्लीस्थित इंदिरा गांधी नॅशनल सेंटर फॉर द आर्ट्स (IGNCA) द्वारे या ग्रंथांच्या प्रादेशिक नोंदणीसाठी नामांकन करण्यात आले होते. उलनाबतार येथील MOWCAP बैठकीत ही कागदपत्रे सादर करणारे IGNCA कला विभागाचे एचओडी प्राध्यापक रमेश चंद्र गौर म्हणाले की, युनेस्कोच्या 38 सदस्य आणि 40 निरीक्षक देशांनी या साहित्यनिर्मितीचे जागतिक महत्त्व ओळखले आहे. हे यश भारतीय संस्कृतीचा प्रसार आणि संवर्धनासाठी मैलाचा दगड ठरेल, असे ते म्हणाले.
रामचरितमानस हा भगवान श्रीरामांच्ा चरित्रावर आधारित एक धार्मिक ग्रंथ आहे, गोस्वामी तुलसीदास यांनी हा ग्रंथ अवधी भाषेत लिहिला होता. पंचतंत्र, ही मूळ संस्कृत भाषेतील एक रचना ज्यामध्ये दंत आणि लोककथांचा समावेश आहे, विष्णू शर्मा यांनी लिहिला होता. सहृदयलोक-लोकन हे आचार्य आनंदवर्धन यांनी संस्कृतमध्ये रचले होते.
SL/ML/SL
15 May 2024
