एस टी महामंडळसाठी ४७७.५२ कोटींचा निधी मंजूर !
मुंबई दि २६– महाराष्ट्र शासनाने महाराष्ट्र राज्य मार्ग परिवहन महामंडळाला (एमएसआरटीसी) मोठा आर्थिक दिलासा दिला आहे. जुलै २०२५ महिन्यातील सवलतमूल्य भरपाईसाठी शासनाने तब्बल ४७७.५२ कोटी रुपयांचा निधी मंजूर केला आहे. एमएसआरटीसीने ही मागणी शासनाकडे केली होती, ज्याला सकारात्मक प्रतिसाद देत हा निधी आर्थिक वर्ष २०२५-२६ मधील ठराविक लेखाशिर्षातून उपलब्ध करून देण्यात येणार आहे. हा निधी बिनशर्त असून थेट महामंडळाच्या खात्यात जमा केला जाणार आहे.
या निर्णयासाठी परिवहन आयुक्त कार्यालयातील अधिकाऱ्यांना विशेष अधिकार देण्यात आले आहेत. शासनाने हा निर्णय वित्त विभागाच्या सहमतीने घेतला असून संबंधित आदेश महाराष्ट्र शासनाच्या संकेतस्थळावर प्रसिद्ध केला आहे. आदेशाचा सांकेतांक २०२५०८२५१४५९४८३४२९ असा आहे.
हा निर्णय राज्यपालांच्या आदेशानुसार जारी करण्यात आला आहे. यामुळे महामंडळाच्या आर्थिक स्थैर्याला मोठा आधार मिळणार असल्याचे मानले जात आहे.
सदर विषया संदर्भात महाराष्ट्र राज्य परिवहन मंत्री प्रताप सरनाईक यांनी सांगितले की,
“एसटी महामंडळ हे ग्रामीण भागासह राज्यातील सर्वसामान्य नागरिकांच्या दैनंदिन प्रवासाचे प्रमुख साधन आहे. एसटी महामंडळाला नियमित आर्थिक सहाय्य पुरवणे ही राज्य सरकारची जबाबदारी असून, प्रवाशांना सुरक्षित व परवडणारी सेवा उपलब्ध राहावी यासाठी हा निर्णय घेण्यात आला आहे. शासनाने जुलै 2025 महिन्यासाठी 477.52 कोटी रुपयांचा निधी रोखीने उपलब्ध करून दिला असून, यामुळे महामंडळाला दिलासा मिळेल व प्रवाशांना नियमित सेवा सुरू ठेवणे शक्य होईल.”
तसेच त्यांनी पुढे सांगितले की, राज्य सरकार एसटी महामंडळाच्या सशक्तीकरणासाठी कटिबद्ध आहे. या अनुषंगाने विविध उपाययोजना व आर्थिक सहाय्य नियमित स्वरूपात दिले जात आहे.ML/ML/MS
