बंजारा समाजाची पारंपरिक होळी उत्साहात साजरी
यवतमाळ, दि. १४ (एमएमसी न्यूज नेटवर्क) : यवतमाळ , वाशिम, नांदेड, अकोला इत्यादी जिल्ह्यात मोठ्या प्रमाणात बंजारा समाज वास्तव्याला आहे. हा समाज आपली पारंपरिक होळी आजही उत्साहात साजरी करतो. यावेळी महिला पारंपरिक वेशभूषा धारण करतात. तर पुरुष सुद्धा फेटा धोती शर्ट जॅकेट असा पेहराव परिधान करतात आणि डफडीच्या तालावर पारंपारिक गीते गात फेर धरून मोठ्या उत्साहात नृत्य सादर करतात.आज यवतमाळ येथे बंजारा बांधवांनी आपली पारंपरिक होळी अतिशय उत्साहात साजरी केली.
यावेळी यवतमाळ जिल्ह्याचे पालकमंत्री संजय राठोड प्रामुख्याने उपस्थित होते. यावेळी त्यांचे पळसाच्या झाडांची फुले देऊन स्वागत करण्यात आले . यानंतर बंजारा बांधवांनी संजय राठोड यांना रंग लावून होळी साजरी केली. राठोड यांनी स्वतः लेंगी नृत्यांमध्ये सहभाग घेऊन नृत्य सादर केले .
