SBI ने भारत सरकारला दिला विक्रमी लाभांश

नवी दिल्ली, दि. २४ (एमएमसी न्यूज नेटवर्क) : देशातील सर्वात मोठी बँक SBI 2023-24 या आर्थिक वर्षासाठी सरकारला 6959.29 कोटी रुपयांचा विक्रमी लाभांश दिला आहे. स्टेट बँक ऑफ इंडियाचे अध्यक्ष दिनेश कुमार खारा यांनी अर्थमंत्री निर्मला सीतारामन यांना लाभांशाचा धनादेश सुपूर्द केला. निर्मला सीतारामन यांच्या कार्यालयाने X या सोशल मीडिया प्लॅटफॉर्मवर याबाबत पोस्ट केली आहे.

एसबीआयने त्यांच्या भागधारकांसाठी आर्थिक वर्ष 2024 साठी प्रति शेअर 13.70 रुपये लाभांश घोषित केला आहे. आर्थिक वर्ष 2023 मध्ये बँकेने प्रति शेअर 11.30 रुपये लाभांश जाहीर केला होता. आर्थिक वर्ष 2024 मध्ये बँकेचा एकत्रित निव्वळ नफा 67,085 कोटी रुपये इतका विक्रमी होता. मागील आर्थिक वर्षात नफा 55,648 कोटी रुपये होता.

बँक ऑफ महाराष्ट्रने 2023-24 या आर्थिक वर्षासाठी सरकारला 857.15 कोटी रुपयांचा लाभांश दिला आहे. बँकेचे व्यवस्थापकीय संचालक निधू सक्सेना आणि कार्यकारी संचालक आशिष पांडे यांनी अर्थमंत्री सीतारामन यांना लाभांशाचा धनादेश सुपूर्द केला.

बँकेने आर्थिक वर्ष 2024 साठी आपल्या भागधारकांना प्रति शेअर 1.40 रुपये लाभांश देण्याचा निर्णय घेतला आहे. बँक ऑफ महाराष्ट्रमध्ये सरकारचा 86.46 टक्के हिस्सा आहे. आर्थिक वर्ष 2024 मध्ये बँकेचा निव्वळ नफा 55.84 टक्क्यांनी वाढून 4,055 कोटी रुपये झाला आहे. मागील आर्थिक वर्षात ते 2,602 कोटी रुपये होते.

SL/ML/SL

24 June 2024