महाराष्ट्रातील प्रमुख धरणांमध्ये ३४.१० टक्केच पाणीसाठा शिल्लक
मुंबई, दि. १३ (एमएमसी न्यूज नेटवर्क) : एप्रिलच्या पहिल्या पंधरवड्यातच राज्यातील पाणीटंचाईचा प्रश्न दिवसेंदिवस अधिक गंभीर होऊ लागला आहे.राज्यातील धरणसाठ्यांनी तळ गाठायला सुरुवात केली आहे. शहरी भागांमध्ये अजूनही काही प्रमाणात पाणी पुरवठा सुरळीत सुरु असला तरी गावातील वाड्यावस्त्यांवर भीषण पाणी टंचाई भेडसावत आहे. जलसंपदा विभागाने शुक्रवारी जाहीर केलेल्या आकडेवारीनुसार, राज्यातील प्रमुख धरणांमधील पाणीसाठा अवघ्या ३४.१० टक्क्यांवर आला आहे. गेल्यावर्षी याच दिवशी हा साठा ४२.०९ टक्के होता. छत्रपती संभाजीनगर येथील धरणांमध्ये केवळ १८.३१ टक्के पाणीसाठा शिल्लक असल्याने परिस्थिती खूपच बिकट बनली आहे. या स्थितीमुळे टँकरने पाणीपुरवठा करणारी गावे आणि वाड्यांची संख्या वाढली असून, राज्यभरात सध्या दोन हजार ९३ टँकरने पाणीपुरवठा सुरू असल्याचे गंभीर वास्तव आहे.
टँकरने राज्यातील विविध गावे आणि वाड्यांमध्ये सुरू असलेल्या पाणीपुरवठाबाबतचा अहवालही राज्य सरकारने जाहीर केला. त्यानुसार शुक्रवारपर्यंत एकूण एक हजार ६६५ गावे आणि तीन हजार ९९९ वाडे आता पाण्यासाठी टँकरवर विसंबून आहेत. गेल्या वर्षीच्या तुलनेत यंदा टँकरची गरज तब्बल २८ पटीने वाढल्याचे आकडेवारीवरून दिसत आहे. राज्यात २२ जिल्ह्यातील एक हजार ६६५ गावे आणि तब्बल तीन हजार ९९९ वाड्यांची तहान भागविण्यासाठी दोन हजार ९३ टँकरद्वारे पाणीपुरवठा केला जात आहे. यात खासगी टँकरची संख्या दोन हजार चार, तर शासकीय टँकरची संख्या ८९ इतकी नोंदविण्यात आली आहे.
धरणांमधील पाणीसाठा लक्षात घेता राज्यातील सर्व मोठे प्रकल्प, मध्यम, प्रकल्प आणि महाराष्ट्र राज्य प्रकल्प अशा सर्व प्रमुख धरणांमध्ये शुक्रवारपर्यंत ३४.१० टक्के पाणीसाठा शिल्लक होता. त्यातील एकूण १३८०६.२४ दक्षलक्ष घनमीटर इतकाच पाणीसाठा उपयुक्त असल्याचे कळते. यात नागपूर येथे ४५.१६ टक्के, अमरावती ४२.४८ टक्के, छत्रपती संभाजीनगर येथे १८.३१ टक्के, नाशिक येथे ३५.२५ टक्के, पुणे येथे ३१.६७ टक्के आणि कोकणात ४१.०७ टक्के इतका पाणीसाठा शिल्लक असल्याचे अहवालात नमूद करण्यात आले आहे.
SL/ML/SL
13 April 2024
