जम्मू-काश्मीरमध्ये प्रथमच भारतीय हवाई दलाचा एअर शो

नवी दिल्ली, दि. २१ (एमएमसी न्यूज नेटवर्क) : जम्मू आणि काश्मीरचे भारतात विलीनीकरण झाल्याची 76 वर्षे आणि जम्मू एअरफोर्स स्टेशनचा हीरक महोत्सव साजरा करण्यासाठी पहिल्यांदाच भारतीय वायुसेनेचा (IAF) एअर शो जम्मू एअर फोर्स स्टेशनवर होणार आहे. 22 सप्टेंबरपासून सुरू होणारा हा शो दोन दिवस चालणार आहे. या एअर शोमध्ये सूर्यकिरण एरोबॅटिक टीम हॉक एमके 132 विमानाने देशाची ताकद दाखवणार आहे. याशिवाय एअर वॉरियर ड्रिल टीम, गॅलेक्सी डेअरडेव्हिल स्काय डायव्हिंग टीम MI-17 हेलिकॉप्टरच्या प्रदर्शनासह आकाशात कामगिरी करतील.

भारतीय हवाई दलाचा एअर वॉरियर सिम्फनी ऑर्केस्ट्रादेखील या शोमध्ये सादर करेल. सुखोई फायटर जेट यात सहभागी होत नाहीये. सर्वसामान्यांनाही हा शो पाहता येणार आहे. 20 सप्टेंबर रोजी भारतीय हवाई दलाच्या जवानांनी या शोसाठी रिहर्सलही केली होती.

सूर्यकिरण एअरोबॅटिक टीमचे विंग कमांडर सिद्धेश कार्तिक यांनी सांगितले की, हा 25 मिनिटांचा शो आहे. तो दोन भागांत सादर केला जाईल. पहिल्या भागात 9 विमानांसह वेगवेगळी फॉर्मेशन्स तयार केली जातील आणि वेगवेगळ्या युद्ध पद्धती असतील. हा भाग फ्लाइटची अचूकता दर्शवेल.

दुसऱ्या भागात, एअरोबॅटिक टीम स्वतःला लहान युनिट्समध्ये विभाजित करते आणि अधिक रोमांचक स्टंट करण्यासाठी जमिनीच्या जवळ येते. आधुनिक फायटर प्लेन काय करू शकते हे या स्टंट्सच्या माध्यमातून आम्ही दाखवण्याचा प्रयत्न करतो.

SL/KA/SL

21 Sept. 2023