आम आदमी पक्षाचे राज्यसभेतील सात खासदार भाजपात, पक्षाला धक्का
नवी दिल्ली, दि. २४ : देशभरातील विविध पक्षांच्या आमदार खासदारांना आपल्या गोटात सामील करण्यासाठी प्रसिद्ध असलेल्या भारतीय जनता पक्षाने आज आप पक्षाच्या राज्यसभेतील ७ खासदारांना आपल्या गळाला लावले आहे. आम आदमी पक्षाच्या १० राज्यसभा खासदारांपैकी सात जण भाजपमध्ये सामील होणार आहेत. पंजाबचे राज्यसभा खासदार राघव चड्ढा यांनी शुक्रवारी दुपारी ४ वाजता एका पत्रकार परिषदेत ही घोषणा केली. ते म्हणाले की, राज्यसभा खासदार संदीप पाठक, अशोक कुमार मित्तल, हरभजन सिंग, विक्रमजीत सिंग साहनी, स्वाती मालीवाल आणि राजेंद्र गुप्ता आमच्यासोबत आहेत.
पत्रकार परिषदेत संदीप पाठक आणि अशोक मित्तल हे देखील उपस्थित होते. अशोक मित्तल हे लवली प्रोफेशनल युनिव्हर्सिटीचे अध्यक्ष असून १० दिवसांपूर्वी (१५ एप्रिल) ईडीने जालंधरमधील त्यांच्या घरावर छापा टाकला होता. राघव चड्ढा, संदीप पाठक आणि अशोक मित्तल यांनी भाजपच्या मुख्यालयात पक्षात प्रवेश केला. उर्वरित चार खासदार अद्याप हजर झालेले नाहीत. स्वाती मालीवाल म्हणाल्या, “मी इटानगरमध्ये आहे. संध्याकाळी दिल्लीला परतल्यानंतर मी तुमच्याशी बोलेन. पंजाबमध्ये २०२७ मध्ये विधानसभा निवडणुका होणार आहेत.”
राघव यांनी सांगितले की, पक्षाच्या दोन-तृतीयांश खासदारांनी हा निर्णय घेतला आहे. त्यामुळे पक्षांतरबंदी कायदा लागू करण्यात काही अर्थ नाही. राघव चड्ढा म्हणाले, गेल्या काही वर्षांपासून मला असे वाटत होते की, मी योग्य व्यक्ती असूनही चुकीच्या पक्षात आहे. आम्ही संविधानातील तरतुदींचा वापर करून भाजपमध्ये विलीन होण्याचा निर्णय घेतला आहे.
SL/ML/SL
