उद्याच्या टाटा मुंबई मॅरेथॉनसाठी देशासह जगातील हजारो धावपटू सज्ज
मुंबई, दि. १७ : उद्या टाटा मुंबई मॅरेथॉन २०२६ आयोजित करण्यात आली असून, भारतासह जगभरातील हजारो धावपटू या प्रतिष्ठित स्पर्धेत सहभागी होणार आहेत. देशातील सर्वात मोठ्या रोड-रनिंग इव्हेंटपैकी एक असलेल्या या मॅरेथॉनच्या २१व्या पर्वाची संपूर्ण तयारी पूर्ण झाली आहे. धावपटूंना धावताना ढगाळ वातावरण आणि कमी तापमानाचा लाभ मिळावा यासाठी पहाटे लवकर सुरुवात करण्याचे नियोजन करण्यात आले आहे. या वर्षीच्या मॅरेथॉनमध्ये तब्बल ६९,००० पेक्षा अधिक धावपटू सहभागी होत असून, ही आतापर्यंतची सर्वाधिक नोंद आहे. यात मैदानावर धावणारे तसेच व्हर्च्युअल धावपटूंंचाही समावेश आहे.
Sony Sports नेटवर्कवर मॅरेथॉनचे थेट प्रक्षेपण असणार आहे तर SonyLIV अॅपवर लाईव्ह स्ट्रिमिंग करण्यात येणार आहे. संपूर्ण देशातील नागरिकांना ही मॅरेथॉन पाहता येणार आहेत.
या वर्षी प्रथमच मॅरेथॉनचा मार्ग कोस्टल रोडवरून जाणार असून, धावपटूंना अरबी समुद्राचं अप्रतिम दृश्य अनुभवता येईल. मॅरेथॉनची सुरुवात छत्रपती शिवाजी महाराज टर्मिनस (CSMT) येथून होईल आणि या मार्गात मरीन ड्राईव्ह, वरळी सी-फेस, बांद्रा-वरळी सी-लिंकसह मुंबईतील अनेक प्रतीकात्मक ठिकाणांचा समावेश आहे. धावपटूंच्या सुरक्षेसाठी मार्गावरील प्रमुख रस्ते पहाटेपासून वाहतुकीसाठी बंद ठेवले जाणार आहेत.
फुल मॅरेथॉन : सकाळी ५:००
हाफ मॅरेथॉन : सकाळी ५:००
१० किमी वेळेनुसार धावणे : सकाळी ६:००
इतर इव्हेंट्स : ड्रीम रन, सीनियर सिटिझन्स रन, डिसॅबिलिटी रन यांची सुरुवात सकाळपासून टप्प्याटप्प्याने होईल.
SL/ML/SL
