CIDCO लवकरच काढणार 22 हजार घरांसाठी लॉटरी
मुंबई, दि. ५ : नवी मुंबईच्या विकासासाठी शहर आणि औद्योगिक विकास महामंडळ (सिडको) कार्य करते. सिडकोकडून लॉटरीच्या माध्यमातून घरं उपलब्ध करून दिली जातात. लवकरच सिडकोच्यावतीने 22000 घरांसाठी लॉटरी काढली जाणार आहे. याबाबत मिळालेल्या माहितीनुसार, दिवाळीच्या मुहूर्तावर सिडकोची लॉटरी जाहीर होणार आहे. सिडको लवकरच या लॉटरी संदर्भात अधिकृत घोषणा करणार आहे.
सिडकोच्या लॉटरीतील घरे नवी मुंबईतील वाशी, जुईनगर, खारघर तर पनवेलमधील तळोजा, द्रोणागिरी या ठिकाणी असण्याची शक्यता आहे. लवकरच प्रसिद्ध होणाऱ्या जाहिरातीत घरं नेमकी कुठं आणि त्यांची किंमत किती याबाबतची माहिती स्पष्ट होईल.
सिडकोच्या घरांच्या किमती म्हाडाच्या तुलनेत थोड्या जास्त असल्याने नागरिक या लॉटरीकडे पाठ फिरवत असल्याचं समोर आलं आहे. तसेच घरांच्या किमती कमी करण्याची मागणी ग्राहकांकडून सातत्याने होत आहे. त्यामुळेच आता घरांच्या किमतींसंदर्भात निर्णयासाठी नगरविकास विभागाने एक विशेष बैठक बोलावली आहे. या बैठकीत घरांच्या किमीत कमी करण्याच्या संदर्भात निर्णय घेतला जाण्याची दाट शक्यता आहे.
