ठाणे रेल्वेस्थानक विकासासाठी ८०० कोटी
ठाणे, दि. 6 (एमएमसी न्यूज नेटवर्क): ऐतिहासिक ठाणे रेल्वे स्थानकाचा विकास करण्यासाठी भाजपाकडून करण्यात आलेल्या प्रयत्नांना यश आले आहे. पंतप्रधान नरेंद्र मोदी यांच्या नेतृत्वाखाली रेल्वे मंत्रालयाने ठाणे रेल्वे स्टेशनच्या पुनर्विकासासाठी ८०० कोटी रुपयांची निविदा जारी केली आहे. येत्या ३१ मार्च रोजी निविदा खुली होत आहे.
या महत्वपूर्ण व ऐतिहासिक निर्णयाबद्दल पंतप्रधान नरेंद्र मोदी, रेल्वेमंत्री अश्विनी वैष्णव, रेल्वे राज्यमंत्री रावसाहेब दानवे, उपमुख्यमंत्री देवेंद्र फडणवीस यांचे भाजपाचे आमदार व ठाणे शहराध्यक्ष निरंजन डावखरे व आमदार संजय केळकर यांनी आभार मानले आहेत.
ठाणे रेल्वे स्टेशनच्या विकासासाठी ठाणे शहर भाजपच्या वतीने रेल्वेमंत्री अश्विनी वैष्णव यांची गेल्या वर्षी ८ डिसेंबर रोजी भेट घेतली होती. राज्यसभेचे तत्कालीन सदस्य विनय सहस्त्रबुद्धे यांच्या नेतृत्वाखाली या शिष्टमंडळात आमदार निरंजन डावखरे, महापालिकेतील तत्कालीन गटनेते मनोहर डुंबरे, सुजय पत्की यांचीही उपस्थिती होती.800 crore for development of Thane railway station
मुंबई-ठाणे दरम्यान १६ एप्रिल १८५३ मध्ये पहिल्यांदा रेल्वे गाडी धावली होती त्यामुळे ठाणे स्थानकालाही ऐतिहासिक दर्जा आहे या रेल्वे स्टेशनच्या विमानतळाच्या धर्तीवर विकासामुळे प्रवाशांचा प्रवास सुकर होईल.
काम कधी सुरू होईल
ठाणे स्थानकाच्या पुनर्विकासासाठी ३१ मार्च २०२३ पर्यंत निविदा प्रक्रिया खुली होत असून ३१ मेपर्यंत संपूर्ण प्रक्रिया पूर्ण केली जाईल. त्यानंतर लगेचच कामाला सुरुवात होणार आहे. त्यामुळे काही महिन्यातच ठाणेकरांना अद्ययावत स्थानक उपलब्ध होईल.
ठाणे रेल्वे स्थानकाप्रमाणे नवीन ठाणे स्टेशनच्या कामासाठी पाठपुरावा केला जात आहे, असे आमदार निरंजन डावखरे यांनी सांगितले. यापूर्वी केंद्र सरकारच्या माध्यमातून ठाणे शहराला कोट्यवधी रुपये निधी उपलब्ध झाला असल्याचेही डावखरे यांनी नमूद केले.
ML/KA/PGB
6 Feb. 2023
