कबड्डीच्या महिला गटात पुण्याला निर्विवाद विजेतेपद

पुणे, दि. 08 (एमएमसी न्यूज नेटवर्क):   एकतर्फी झालेल्या अंतिम सामन्यात पुणे संघाने मुंबई उपनगर संघाचे आव्हान ३९-१९ असे मोडून काढले आणि राज्य मिनी ऑलिंपिक क्रीडा स्पर्धेतील महिलांच्या कबड्डी मध्ये निर्विवाद विजेतेपद पटकावले. पूर्वार्धात ते १८ विरुद्ध ९ असे आघाडीवर होते.Undisputed title for Pune in women’s category of Kabaddi

बारामती येथील तुळजाराम चतुरचंद महाविद्यालयाच्या मैदानावर या स्पर्धेचे आयोजन करण्यात आले होते. प्रेक्षकांचा अभूतपूर्व प्रतिसाद लाभलेल्या या स्पर्धेतील महिलांच्या अंतिम सामन्यात सुरुवातीपासूनच पुणे संघाने खेळावर नियंत्रण ठेवले होते. सायली किरपाळे व आम्रपाली गलांडे यांच्या चतुरस्त्र खेळाच्या जोरावर पुणे संघ सहज विजयी होणार ही काळ्या दगडावरची रेघ होती.

खोलवर चढाया व भक्कम पकडी याच्या जोरावर पुणे संघाने सहज विजय संपादन केला. अंकिता जगताप व साक्षी काळे यांनी उत्कृष्ट पकडी करीत पुणे संघाच्या विजयास हातभार लावला. मुंबई उपनगरच्या हरजित कौर व याशिका पुजारी यांनी चढायांमध्ये तर तेजस्वी पाटेकर व सायली जाधव यांनी पकडींमध्ये केलेले प्रयत्न संघाचा पराभव टाळू शकले नाहीत.

ML/KA/PGB
8 Jan. 2023