UGC कडून M.Phil अभ्यासक्रमाची मान्यता रद्द
नवी दिल्ली, दि. २७ (एमएमसी न्यूज नेटवर्क) : विद्यापीठ अनुदान आयोगाने (UGC) एम.फिल (M.Phil) म्हणजेच मास्टर ऑफ फिलॉसॉफी अभ्यासक्रम रद्द करण्याचा निर्णय घेतला आहे. या संदर्भात यूजीसीने एक पत्रक प्रसिद्ध केलं आहे.M.Phil अभ्यासक्रमाची मान्यता रद्द करण्याचा निर्णय यूजीसीने घेतला असून या अभ्यासक्रमासाठी कुठल्याही विद्यापीठात विद्यार्थ्यांनी प्रवेश घेऊ नये असे आवाहन सुद्धा करण्यात आले आहे.
राष्ट्रीय शैक्षणिक धोरण 2020 (नॅशनल एज्युकेशन पॉलिसी 2020) मध्ये ही पदवी बंद करण्याची शिफारस करण्यात आली होती. यावर्षीपासून या पदवीची मान्यता रद्द करण्यात आली आहे. त्यामुळेच या अभ्यासक्रमासाठी विद्यार्थ्यांनी प्रवेश देऊ नये अशी विनंती यूजीसीने महाविद्यालय आणि तसेच विद्यार्थ्यांनाही केली आहे.
यूजीसीचे सचिव मनीष जोशी यांनी सांगितले की, M.Phil अभ्यासक्रमासाठी विद्यापीठांनी विद्यार्थ्यांना प्रवेश देऊ नये. M.Phil पदवीला आता मान्यता नाहीये. तसेच 2024-25 या अभ्यासक्रमाच्या सत्रासाठी M.Phil अभ्यासक्रमाचे प्रवेश थांबवण्यासाठी यूजीसीने तातडीने पावले उचलण्यास सांगण्यात आले आहे.
यूजीसीने पत्रकात म्हटलं आहे की, M.Phil ही पदवी मान्यताप्राप्त नाहीये. M.Phil म्हणजेच मास्टर ऑफ फिलॉसॉफी हा दोन वर्षांचा पदव्युत्तर शैक्षणिक संशोधन प्रोग्राम आहे जो पीएचडीसाठी तात्पुरती नावनोंदणी म्हणून सुद्धा काम करतो. पण आजपासून यूजीसीने M.Phil या पदवीवा मान्यता देणे बंद केले आहे.
यूजीसीने आपल्या पत्रकात पुढे स्पष्ट म्हटले आहे की, काही विद्यापीठे M.Phil अभ्यासक्रमासाठी नव्याने प्रवेश देत असल्याचं निदर्शनास आले आहे. पण या पदवीला मान्यता नाहीये. त्यामुळे या अभ्यासक्रमासाठी किंवा पदवीसाठी कोणत्याही महाविद्यालयांनी प्रवेश देऊ नये आणि विद्यार्थ्यांनी सुद्धा या अभ्यासक्रमासाठी प्रवेश घेऊ नये.M.Phil ही पदवी आर्ट्स अँड ह्युमॅनिटीज, सायन्स, मॅनेजमेंट, सायकोलॉजी आणि कॉमर्स इत्यादी विषयांमध्ये घेतली जाते. या संदर्भात तयार करण्यात आलेल्या नियमावलीचा संदर्भ देत यूजीसीने ही पदवी अवैध्य असल्याचं म्हटलं आहे.
SL/KA/SL
27 Dec. 2023