ट्रान्सजेंडर महिला आता महिलांसोबत ऑलिम्पिकमध्ये खेळू शकणार नाहीत
लॉज़ेन, दि. २७ : आंतरराष्ट्रीय ऑलिंपिक समितीने 2028 च्या लॉस एंजेलिस ऑलिंपिकमध्ये ट्रान्सजेंडर महिलांना आता महिला गटातील स्पर्धांमध्ये भाग घेण्याची परवानगी नसल्याचे स्पष्ट केले आहे. नवीन धोरणानुसार, आता फक्त ‘बायोलॉजिकल फीमेल्स’ (ज्या महिला जन्मापासूनच महिला आहेत) त्यांनाच महिला गटात खेळण्याची परवानगी असेल. यासाठी एकदा जीन टेस्ट (SRY जीन स्क्रीनिंग) करणे आवश्यक असेल, ज्यामुळे लिंगाची पुष्टी केली जाईल. ही चाचणी लाळ, गालाचा स्वॅब किंवा रक्ताच्या नमुन्यातून केली जाऊ शकते.
तर, जे खेळाडू जन्मावेळी महिला होते, परंतु आता स्वतःला ट्रान्सजेंडर पुरुष (Trans Men) मानतात, ते महिला स्पर्धांमध्ये खेळणे सुरू ठेवू शकतात. 2021 मध्ये न्यूझीलंडची वेटलिफ्टर लॉरेल हबर्ड ऑलिम्पिकमध्ये भाग घेणारी पहिली ट्रान्सजेंडर महिला ठरली होती. आतापर्यंत, IOC ट्रान्सजेंडर महिलांना टेस्टोस्टेरोनची पातळी कमी ठेवण्याच्या अटीवर खेळण्याची परवानगी देत होती, किंवा निर्णय वैयक्तिक क्रीडा संघटनांवर सोडला जात होता.
पॅरिस ऑलिम्पिक 2024 दरम्यान दोन महिला बॉक्सर्सच्या सहभागावरून वाद निर्माण झाला होता. 66 किलोग्राम वजनी गटात अल्जेरियाच्या इमान खलीफ आणि 57 किलोग्राम वजनी गटात तैवानच्या लिन यू टिंग यांच्या खेळण्यावर इतर खेळाडूंनी आक्षेप घेतला होता.
तैवानी बॉक्सर लिन यू-टिंगला 2023 मध्ये इंटरनॅशनल बॉक्सिंग असोसिएशन (IBA) द्वारे केलेल्या लिंग-संबंधित तपासणीत अयशस्वी घोषित करण्यात आले होते. याउपरही, IOC ने त्यांना पॅरिस ऑलिम्पिकमध्ये महिला 57 किलोग्राम वजनी गटात भाग घेण्याची परवानगी दिली, जिथे त्यांनी सुवर्णपदक जिंकले.
SL/ML/SL
