‘परंपरा’ या चित्रपटाचा ट्रेलर लाँच
मुंबई, दि. २० (एमएमसी न्यूज नेटवर्क) : प्रणय निशिकांत तेलंग दिग्दर्शित ‘परंपरा’ हा चित्रपट येत्या २६ एप्रिलला मोठ्या पडद्यावर रिलीज होणार आहे. पूर्वीपासून लादलेल्या परंपरा खूप काही गोष्टी शिकवतात. पण अनेक परंपरा माणूस आपल्या स्वार्थासाठी बदलतो. समाजाने जबरदस्तीने लादलेल्या परंपरेचा एका कुटुंबावर होणारा परिणाम सांगणाऱ्या ‘परंपरा’ चित्रपटाचा नुकताच ट्रेलर रिलीज झाला. अभिनेते मिलिंद शिंदे आणि अभिनेत्री वीणा जामकर हे परंपरामध्ये मुख्य भूमिकेत दिसणार आहेत.
चित्रपटची पटकथा प्रणय निशाकांत तेलंग आणि संजय सावंत यांची असून छायाचित्र निशा तेलंग यांनी केले आहे. मंगेश कांगणे यांनी लिहिलेल्या गीतांना आनंद मेनन यांचे मधुर संगीत लाभले आहे. प्रतिकूल परिस्थितीत परंपरेच्या जपणुकीवर चित्रपटाचे कथानक आहे. प्रेक्षकांच्या मनात खोलवर परिणाम करणारं कथानक या चित्रपटात मांडण्यात आलं आहे. ‘परंपरा’ हा चित्रपट केवळ मनोरंजनच नाही, तर आजच्या बदलत्या जगात वारसा आणि परंपरेचे महत्त्व दर्शवणारा आहे. त्याशिवाय ग्रामीण भागातील शेतकरी कुटुंबाचं जगणं, सामाजिक ताण याचं दर्शनही हा चित्रपट घडवतो.
अभिनेते मिलिंद शिंदे आणि अभिनेत्री वीणा जामकर यांच्यासह प्रकाश धोत्रे, अरुण कदम, नम्रता पावसकर, किशोर रावराणे, जयराज नायर, रोहित चव्हाण, प्रशांत नेमण, भूषण घाडी, मास्टर मच्छिंद्र, दिवंगत अभिनेते जनार्दन परब यांचा दमदार अभिनय हे या चित्रपटाचं वैशिष्ट्य आहे.
SL/ML/SL
20 April 2024
