उत्तरकाशी बोगद्यात अडकलेल्यांची होणार काही तासात सुटका

उत्तरकाशी, दि. २३ (एमएमसी न्यूज नेटवर्क) : १२ नोव्हेंबरला घडलेल्या दुर्घटनेत उत्तराखंडच्या उत्तरकाशी बोगद्यातील ४१ कामगाराना वाचवण्यासाठी सुरु असलेल्या अहोरात्र परिश्रमांना आता काही तासांतच यश लाभणार आहे. येत्या काही तासांत या मजुरांची सुटका होणार असल्याचे आज स्पष्ट झाले. आज दुपारी 1.15 वाजता उर्वरित 18 मीटरचे खोदकाम कामगारांपर्यंत पोहोचण्यासाठी सुरू करण्यात आले. मात्र 1.8 मीटर खोदकाम केल्यानंतर ढिगाऱ्यामध्ये लोखंडी रॉड आल्याने खोदकाम थांबवावे लागले. दोन तज्ञांच्या मदतीने, रॉड कापला गेला, त्यानंतर पुन्हा ड्रिलिंगचे काम सुरू झाले.

राष्ट्रीय आपत्ती व्यवस्थापन प्राधिकरण (NDMA) सदस्य लेफ्टनंट जनरल सय्यद अता हसनैन यांनी आज सांगितले की, – आम्ही येत्या काही तासांत किंवा उद्यापर्यंत कामगारांना बाहेर काढू. हे काम खूपच आव्हानात्मक आहे. अशा परिस्थितीत बोगद्यात अडकलेल्या मजुरांचा आणि बचाव पथकातील सदस्यांचा जीव धोक्यात आहे. दोघांच्या सुरक्षेची काळजी घेणे आवश्यक आहे.

ड्रिलिंग पूर्ण झाल्यावर, 15 सदस्यीय NDRF टीम हेल्मेट, ऑक्सिजन सिलिंडर आणि गॅस कटरसह 800 मिमी पाइपलाइनमधून आत जाईल. आत अडकलेल्या लोकांना बाहेरील परिस्थिती आणि हवामानाची माहिती दिली जाईल. बोगद्याच्या आतील आणि बाहेरील तापमानात मोठी तफावत असल्याने कामगारांना तातडीने बाहेर काढले जाणार नसल्याचे डॉक्टरांचे म्हणणे आहे.

कामगार अशक्त वाटत असल्यास NDRF टीम त्यांना स्केट्स बसवलेल्या तात्पुरत्या ट्रॉलीद्वारे पाइपलाइनमधून बाहेर काढेल. यानंतर 41 मजुरांना रुग्णवाहिकेतून चिल्यानसौर सामुदायिक आरोग्य केंद्रात नेले जाईल. येथे 41 खाटांचे रुग्णालय तयार आहे. चिल्यानसौरला पोहोचण्यासाठी सुमारे 1 तास लागेल, ज्यासाठी ग्रीन कॉरिडॉर बनविला गेला आहे. गरज भासल्यास कामगारांना विमानाने ऋषिकेश एम्समध्ये नेले जाईल.

उत्तरकाशी बोगद्याच्या दुर्घटनेनंतर रस्ते आणि वाहतूक मंत्रालयाने देशभरात बांधल्या जाणाऱ्या २९ बोगद्यांचे सेफ्टी ऑडिट करण्याचा निर्णय घेतला आहे. त्यासाठी कोकण रेल्वे कॉर्पोरेशन लिमिटेडसोबत करार करण्यात आला आहे.

SL/KA/SL

23 Nov. 2023