या’ 8 बँका देत आहेत FD वर सर्वाधिक व्याज
मुंबई, दि. ११ : भारतात मुदत ठेवी (Fixed Deposit – FD) हा सर्वात सुरक्षित गुंतवणूक पर्याय मानला जातो. गुंतवणूकदारांना निश्चित व्याजदराने स्थिर परतावा मिळतो, त्यामुळे जोखीम न घेता हमखास उत्पन्न मिळवू इच्छिणाऱ्यांसाठी ही योजना आदर्श ठरते. बँका, पोस्ट ऑफिस, लघु वित्त बँका (SFB) आणि नॉन-बँकिंग फायनान्स कंपन्या (NBFC) यांच्याकडून एफडी सुविधा उपलब्ध करून दिल्या जातात. सध्या भारतातील प्रमुख बँका सामान्य ग्राहकांसाठी वार्षिक २.७५% ते ७.२५% तर ज्येष्ठ नागरिकांसाठी ३.२५% ते ७.७५% पर्यंत व्याजदर देत आहेत.
अ‍ॅक्सिस बँक ३ कोटी रुपयांपर्यंतच्या ठेवींवर ३.००% ते ६.६०% वार्षिक व्याजदर देते, तर ज्येष्ठ नागरिकांना ३.५०% ते ७.३५% पर्यंत व्याज मिळते. गुंतवणुकीचा कालावधी ७ दिवसांपासून १० वर्षांपर्यंत असतो. एचडीएफसी बँकेत ७ दिवस ते १० वर्षांच्या मुदतीसाठी एफडी उपलब्ध असून सामान्य ग्राहकांना २.७५% ते ६.६०% व्याजदर मिळतो. ज्येष्ठ नागरिकांना प्रत्येक मुदतीवर अतिरिक्त ०.५०% व्याज दिले जाते.
आयसीआयसीआय बँकेच्या एफडी योजनांमध्येही व्याजदर २.७५% ते ६.६०% इतके आहेत, ज्येष्ठ नागरिकांना जास्त दरांचा लाभ मिळतो. आयडीबीआय बँक ३.००% ते ७.०५% पर्यंत व्याजदर देते आणि तिच्या योजनांचा कालावधी ७ दिवसांपासून २० वर्षांपर्यंत असतो.
स्टेट बँक ऑफ इंडिया (एसबीआय) मध्ये मुदत ठेवी ७ दिवस ते १० वर्षांपर्यंत असून सामान्य ग्राहकांना ३.०५% ते ६.८५%, तर ज्येष्ठ नागरिकांना ३.५५% ते ७.३५% व्याजदर मिळतो. हे दर जुलै २०२५ पासून लागू होतील. पंजाब नॅशनल बँक (पीएनबी) मध्ये एफडीवरील व्याजदर ३.००% ते ६.४०% असून ज्येष्ठ नागरिकांना अतिरिक्त ०.५०% व्याज मिळते.
सेंट्रल बँक ऑफ इंडिया ३.५०% ते ६.७५% व्याजदर देते, तर बँक ऑफ बडोदाच्या योजनांमध्ये ३.५०% ते ६.५०% व्याजदर मिळतो. बँक ऑफ बडोदा तीन प्रकारच्या एफडी योजना देते – कॅपिटल गेन अकाउंट स्कीम १९८८, लॉन्ग टर्म डिपॉझिट स्कीम आणि शॉर्ट-टर्म डिपॉझिट स्कीम.
यावरून स्पष्ट होते की, मुदत ठेवी अजूनही भारतीय गुंतवणूकदारांसाठी सर्वाधिक विश्वासार्ह पर्याय आहेत. स्थिर परतावा, निश्चित व्याजदर आणि विविध कालावधींच्या योजनांमुळे एफडी हा सुरक्षित गुंतवणुकीचा पाया ठरतो.
SL/ML/SL
