युरोपियन युनियनने बदलले व्हिसाचे नियम
मुंबई, दि. २३ (एमएमसी न्यूज नेटवर्क) : युरोपला जाणाऱ्या भारतीयांसाठी खुशखबर आहे. भारतीय नागरिक आता दीर्घ वैधतेसह शेंगेन व्हिसासाठी अर्ज करू शकतात. युरोपियन युनियनने यासंबंधी काही नियम बदलले आहेत. नवीन नियमानुसार आता पाच वर्षांसाठी मल्टिपल एंट्रीच्या शेंगेन व्हिसासाठी अर्ज करता येईल.
युरोपीय देशांत जाण्यासाठी तुमच्याजवळ शेंगेन व्हिसा असणे आवश्यक आहे. या व्हिसाच्या माध्यमातून पर्यटक विविध युरोपीय देशांना भेट देऊ शकतात. युरोपियन युनियनने 18 एप्रिल रोजी भारतीय नागरिकांना शेंगेन व्हिसा जारी करण्यासाठी नवीन नियम लागू केले. सध्या लागू असलेल्या व्हिसा कोडच्या नियमांपेक्षा हे सोपे आहेत. 18 एप्रिलपासून लागू होणारी ही नवीन प्रणाली भारतीय प्रवाशांसाठी अतिशय फायदेशीर आहे. नवीन नियमांनुसार, भारतात राहणा-या भारतीय नागरिकांना कायदेशीररीत्या गेल्या तीन वर्षांत दोन व्हिसा प्राप्त केल्यानंतर आणि वापरल्यानंतर दोन वर्षांसाठी वैध असलेला दीर्घकालीन मल्टी-एंट्री शेंगेन व्हिसा जारी केला जाऊ शकतो.
पासपोर्टमध्ये पुरेशी वैधता शिल्लक असेल तर हा प्रारंभिक दोन वर्षांचा व्हिसा त्यानंतर पाच वर्षांचा व्हिसा मिळू शकतो. या विस्तारित वैधतेमुळे प्रवाशांना कोणत्याही 180 दिवसांच्या कालावधीत 90 दिवसांपर्यंत शेंगेन परिसरात मुक्तपणे फिरता येते.
या व्हिसाद्वारे एकूण 29 देशांमध्ये प्रवास करता येतो. शेंगेन क्षेत्रामध्ये 29 युरोपीय देश आहेत, त्यापैकी 25 युरोपियन युनियन देश आहेत. या देशांमध्ये बेल्जियम, बल्गेरिया, क्रोएशिया, झेक प्रजासत्ताक, डेन्मार्क, जर्मनी, एस्टोनिया, ग्रीस, स्पेन, फ्रान्स, इटली, लॅटव्हिया, लिथुआनिया, लक्झेंबर्ग, हंगेरी, माल्टा, नेदरलँड, ऑस्ट्रिया, पोलंड, पोर्तुगाल, रोमानिया, स्लोव्हेनिया, स्लोव्हाकिया यांचा समावेश आहे. फिनलंड आणि स्वीडन, तसेच आइसलँड, लिकटेंस्टीन, नॉर्वे आणि स्वित्झर्लंड या समाविष्ठ आहेत.
SL/ML/SL
23 April 2024
