अयोध्येतील मंदीरात प्रभू श्रीरामांच्या मूर्तीच्या प्राणप्रतिष्ठेची तारीख निश्चित
अयोध्या, दि. २६ (एमएमसी न्यूज नेटवर्क) : देशभरातील रामभक्तांची प्रतीक्षा अखेर संपणार आहे. राम मंदिराचे मुख्य पुजारी आचार्य सत्येंद्र दास महाराज यांनी यासंदर्भातील माहिती एएनआय या वृत्तसंस्थेसोबत बोलताना दिली आहे. राम मंदिर निर्माण समितीचे अध्यक्ष नृपेंद्र मिश्रा यांनी देखील तीन मजली राम मंदिराचा तळमजल्याचं काम डिसेंबर महिन्याच्या अखेरीस पूर्ण होईल. राम मंदिरात रामलल्लाच्या प्राण प्रतिष्ठेचा सोहळा २२ जानेवारी रोजी पार पडणार आहे, अशी माहिती दिली. अयोध्येत पंतप्रधान नरेंद्र मोदी यांच्या उपस्थितीमध्ये रामलल्लाची प्राणप्रतिष्ठा होणार आहे.
अयोध्येत राम मदिराचं काम वेगात सुरु आहे. राम मंदिर निर्माण समितीचे अध्यक्ष यांनी या कामासंदर्भातील माहिती दिली आहे. तर, राम मंदिराचे प्रमुख पुजारी आचार्य सत्येंद्र दास महाराज यांनी १५ ते २४ जानेवारी दरम्यान अनुष्ठान सोहळा असेल. आमच्याकडून पीएमओला पत्र देण्यात आलं आहे. पीएमओकडून यासंदर्भातील उत्तर देखील आलेलं आहे. आता २२ जानेवारी रोजी पंतप्रधान नरेंद्र मोदी अयोध्येला येणार आहेत. त्या दिवशी रामलल्लाची प्राण प्रतिष्ठा होणार आहे. अन्य लोकांना देखील बोलावलं आहे, असं सत्येंद्र दास महाराज म्हणाले. १४ ते २४ जानेवारी दरम्यानच्या या सोहळ्यानंतर राम मंदिर सर्वसामान्य भक्तांसाठी खुलं होण्याची शक्यता आहे. मात्र, त्यासंदर्भातील अधिकृत घोषणा करण्यात आलेली नाही. दुसरीकडे ट्रस्टचे सचिव चंपत राय यांनी अनुष्ठान सोहळा टीव्हीवरुन पाहण्याचं आवाहनं केलं आहे.
नृपेंद्र मिश्रा यांनी राम मंदिराच्या कामाबद्दल माहिती दिली. इथं एक उपकरण बनवलं जात असून ते मंदिराच्या शिखरावर बसवण्यात येणार आहे. त्याद्वारे दरवर्षी रामनवमीच्या दिवशी सूर्यकिरण काही क्षणांसाठी गर्भगृहात राम लल्लाच्या मूर्तीवर पडतील, असं ते म्हणाले. याची निर्मिती बंगळुरुमध्ये केली जात आहे. वैज्ञानिक आणि केंद्रीय भवनं संशोधन संस्था रुरकी आणि पुण्याच्या एका संस्थेच्या संयुक्त प्रयत्नातून ते काम सुरु असल्याचं ते म्हणाले.
SL/KA/SL
26 Sept. 2023
