मुंबई मनपाकडून विक्रमी मालमत्ता कर संकलन
मुंबई, दि. २ (एमएमसी न्यूज नेटवर्क) : मालमत्ता कर हा मुंबई मनपाच्या आर्थिक स्रोतांपैकी अत्यंत महत्त्वपूर्ण स्रोत मानला जातो. यावर्षी मुंबई मनपाने विक्रमी कर संकलन केले आहे. बृहन्मुंबई महानगरपालिकेच्या करनिर्धारण आणि संकलन विभागाच्या मालमत्ता कर संकलन विभागाने सन २०२४-२५ या आर्थिक वर्षासाठी निर्धारित करण्यात आलेल्या ६ हजार २०० कोटी रुपयांच्या उद्दिष्टाच्या तुलनेत महानगरपालिकेने ६ हजार १९८ कोटी ०५ लाख रुपये इतके मालमत्ता कर संकलन केले आहे. तसेच, अतिरिक्त दंडाच्या स्वरूपात अधिकचे १७८ कोटी ३९ लाख रुपयांची वसुली करण्यात आली आहे.
महानगरपालिका आयुक्त तथा प्रशासक भूषण गगराणी यांच्या निर्देशांनुसार, अतिरिक्त महानगरपालिका आयुक्त (शहर) डॉ. अश्विनी जोशी यांच्या मार्गदर्शनात तसेच सह आयुक्त (करनिर्धारण व संकलन) विश्वास शंकरवार आणि करनिर्धारक व संकलक गजानन बेल्लाळे यांच्या देखरेखीखाली करनिर्धारण व संकलन विभागाच्या वतीने मालमत्ता कर संकलनासाठी सातत्यपूर्ण प्रयत्न करण्यात आले. नागरिकांनी वेळेवर मालमत्ता करभरणा करावा, यासाठी जनजागृती करणे; निर्धारित कालावधीत नागरिकांना मालमत्ता कराचा भरणा करता यावा, यासाठी साप्ताहिक तसेच सार्वजनिक सुटीच्या दिवशी नागरी सुविधा केंद्र ठेवणे; करभरणा करण्यासाठी ऑनलाइन सुविधा उपलब्ध करून देणे; मोठ्या थकबाकीदारांवर लक्ष केंद्रित करणे तसेच मागील थकबाकी वसुलीसाठी पाठपुरावा करणे, आदी प्रयत्नांचा यामध्ये समावेश होता.
बृहन्मुंबई महानगरपालिकेने सन २०२४-२५ या आर्थिक वर्षासाठी ६ हजार २०० कोटी रुपये मालमत्ता कर संकलनाचे उद्दिष्ट ठेवले होते. करनिर्धारण व संकलन विभागाचे अधिकारी, कर्मचारी यांच्या प्रयत्नांमुळे तसेच मुंबईकर नागरिकांच्या सहकार्याने बृहन्मुंबई महानगरपालिकेने सन २०२४-२५ या आर्थिक वर्षासाठी २६ मे २०२४ ते ३१ मार्च २०२५ या निर्धारित कालावधीदरम्यान ६ हजार १९८ कोटी ५ लाख रुपये इतके मालमत्ता कर संकलित करण्यात आला. हे प्रमाण एकूण उद्दिष्टाच्या ९९.९७ टक्के इतके आहे. सोबतच, अतिरिक्त दंडाच्या स्वरूपात १७८ कोटी ५० हजार रुपयेही संकलित करण्यात आले आहेत.
SL/ML/SL
2 April 2025
