RBI ने या तीन बँकांना ठोठावला २.४९ कोटींचा दंड
मुंबई, दि. १३ (एमएमसी न्यूज नेटवर्क) : देशभरातील बँकांमध्ये आर्थिक शिस्त राखली जावी यासाठी RBI कडून आर्थिक अव्यवस्था असणाऱ्या बँकांना वेळोवळी दंड करत असते. भारतीय रिझर्व्ह बँकेन् (RBI) नियामक नियमांचे उल्लंघन केल्याप्रकरणी तीन बँकांना एकूण 2.49 कोटी रुपयांचा दंड ठोठावला आहे. आरबीआयने धनलक्ष्मी बँक, पंजाब आणि सिंध बँक आणि ESAF स्मॉल फायनान्स बँकेवर कारवाई केली आहे. बँकांवरील या कारवाईची माहिती आरबीआयने काल प्रसिद्ध केली.
आरबीआयने सांगितले की, धनलक्ष्मी बँकेला कर्ज आणि अॅडव्हान्सेस – वैधानिक आणि इतर निर्बंध, तसेच केवायसी संबंधित नियम आणि ठेवींवरील व्याजदरांबाबत काही निर्देशांचे पालन न केल्याबद्दल 1.20 कोटी रुपयांचा दंड ठोठावण्यात आला आहे. याशिवाय पंजाब अँड सिंध बँकेला कर्ज आणि अॅडव्हान्सेस – वैधानिक आणि इतर निर्बंध यासंबंधी काही सूचनांचे पालन न केल्याबद्दल 1 कोटी रुपयांचा दंड ठोठावण्यात आला आहे. बँकांमधील ग्राहक सेवा संदर्भात जारी केलेल्या सूचनांचे पालन न केल्याबद्दल ESAF स्मॉल फायनान्स बँकेला 29.55 लाख रुपयांचा दंड ठोठावण्यात आला आहे.
दरम्यान, केंद्र सरकारने शुक्रवारी 12 जानेवारी रोजी रिझर्व्ह बँकेचे डेप्युटी गव्हर्नर मायकल देबब्रत पात्रा यांचा कार्यकाळ एक वर्षाने वाढवला. पात्रा यांचा कार्यकाळ 14 जानेवारीला संपत होता. अधिकृत अधिसूचनेनुसार, पंतप्रधान नरेंद्र मोदी यांच्या अध्यक्षतेखालील मंत्रिमंडळाच्या नियुक्ती समितीने पात्रा यांची आरबीआयचे डेप्युटी गव्हर्नर म्हणून 15 जानेवारीपासून एका वर्षाच्या कालावधीसाठी पुनर्नियुक्ती करण्यास मान्यता दिली आहे. पात्रा यांची पहिल्यांदा डेप्युटी गव्हर्नर म्हणून जानेवारी 2020 मध्ये 3 वर्षांच्या कार्यकाळासाठी नियुक्ती करण्यात आली होती. पात्रा यांच्याकडे चलनविषयक धोरण विभागाची जबाबदारी आहे. ते चलनविषयक धोरण समितीचे (MPC) सदस्य देखील आहेत.
SL/KA/SL
13 Jan. 2024
