‘वेटिंग लिस्ट’ बाबत रेल्वेचा मोठा निर्णय
नवी दिल्ली, दि. २१ : रेल्वे बोर्डाने तिकीट यंत्रणेत सुधारणा करण्यासाठी व प्रवाशांची गाडीतील गर्दी कमी करण्यासाठी नवीन निर्णय घेतला आहे. आता कोणत्याही लांब पल्ल्याच्या रेल्वे गाड्यांमध्ये मोठी ‘वेटिंग लिस्ट’ जारी होणार नाही. प्रत्येक गाडीत ‘वेटिंग लिस्ट’च्या तिकिटांच्या संख्येला कात्री लावण्यात येणार आहे. गाडीतील एकूण प्रवासी संख्येच्या २५ टक्केच अधिक ‘वेटिंग तिकिटे’ जारी करण्यात येतील. हा नियम सर्वच वर्गांसाठी लागू होणार आहे. ‘वेटिंग’ तिकीट असलेले अनेक प्रवासी रेल्वेत चढत असल्याच्या असंख्य तक्रारी रेल्वेकडे येत होत्या. त्यामुळे ट्रेनमध्ये गर्दी वाढून पक्के तिकीट असलेल्या प्रवाशांवर अन्याय होत होता. हे विचारात घेऊन रेल्वेने आता कायमस्वरूपी हा निर्णय लागू केला आहे.
रेल्वे बोर्डाने सर्वच रेल्वे विभागांना याबाबतचा आदेश पाठवला आहे. त्यानुसार, ‘वेटिंग लिस्ट’च्या तिकिटांची संख्या प्रत्येक वर्गातील एकूण तिकिटांपेक्षा २५ टक्क्यांपेक्षा अधिक नसेल. उदा. एका गाडीत ‘स्लीपर’ वर्गाची १०० तिकिटे असल्यास ‘वेटिंग लिस्ट’मध्ये २५ जणांचीच नावे असतील.
यापूर्वी ‘वेटिंग लिस्ट’ला कोणतीही मर्यादा नव्हती. सणासुदीला व सुट्ट्यांमध्ये ‘स्लीपर’ वर्गात ३०० पेक्षा अधिक, तर ‘एसी’त १५० पेक्षा अधिक वेटिंग होत होते. त्यामुळे प्रवाशांना प्रचंड मनस्ताप सहन करावा लागत होता. ज्यांच्याकडे रेल्वेचे पक्के (कन्फर्म) तिकीट नव्हते. तेही ट्रेनमधून प्रवास करत होते. त्यामुळे गाडीत पाय ठेवायलाही जागा होत नव्हती.
प्रत्येक डब्यातील जागांपेक्षा २५ टक्के अधिक ‘वेटिंग लिस्ट’ असेल. सर्वसामान्य प्रवाशांसाठी उपलब्ध असलेल्या तिकिटांसाठी हा निर्णय लागू असेल. ज्येष्ठ नागरिक, महिला, परदेशी पर्यटक व दिव्यांग आदींसाठी आरक्षित असलेल्या तिकिटांचा ‘वेटिंग लिस्ट’मध्ये समावेश नसेल. उदा. सर्व प्रकारचा कोटा हटवल्यानंतर ४०० तिकिटे उपलब्ध असल्यास १०० पर्यंत वेटिंग लिस्ट असेल. हा नियम स्लीपर, थर्ड एसी, सेकंड एसी, चेअर कार, तत्काळ आदींसाठी लागू असेल.
