रेल्वे रुळांवर आलेल्या ट्रकला एक्सप्रेसची धडक
जळगाव दि १४ — जळगाव जिल्ह्यातील बोदवड रेल्वे स्थानकाजवळील फाटकावर आज अमरावती एक्स्प्रेसची ट्रकला धडक बसल्याने मोठा अपघात झाला मात्र त्यात कोणतीही जीवित हानी झाली नाही. बंद असलेल्या रेल्वे गेट मधून धान्याने भरलेला ट्रक मध्येच आल्याने हा भीषण अपघात झाला. रेल्वे गेट पास करत असताना अचानक ट्रक बंद पडल्याने अपघात घडल्याची प्राथमिक माहिती आहे.रेल्वे ट्रॅकवर धान्य भरलेला ट्रक बंद पडल्याने समोरून येणाऱ्या मुंबई अमरावती एक्सप्रेसने ट्रकला जोरदार धडक दिली. अमरावती एक्सप्रेसची धडक इतकी जोरदार होती की, ट्रक चक्क 100 मीटर फरफटत रेल्वे मार्गावर पुढे गेल्याचे समोर आले आहे. हा ट्रक अमरावती एक्सप्रेसच्या इंजिन मध्ये अडकला होता. मात्र रेल्वे चालकाने वेळीच नियंत्रण मिळवल्याने मोठी जीवित हानी टळली आहे.
ट्रकमध्ये भरलेल्या धान्याचा मात्र चकनाचूर झाला आहे.या घटनेची माहिती मिळताच तात्काळ त्या ठिकाणी रेल्वे बचाव पथक आले असून त्यांनी रेल्वे मार्गावरील गव्हाच्या गोण्यांसह ट्रकचे तुकडे बाजूला करण्याचं काम सुरू करण्यात आले. यामुळे अनेक तास रेल्वेची भुसावळ नागपूर वाहतूक विस्कळीत झाली होती. दुपारनंतर ही वाहतूक हळूहळू सुरू झाली.
