सॅनिटरी नॅपकीनच्या पाकीटावर राहुल गांधींचा फोटो
पटणा, दि. ४ : बिहारमध्ये काँग्रेसने सुरू केलेल्या एका निवडणूकपूर्व उपक्रमामुळे मोठा राजकीय वाद निर्माण झाला आहे. काँग्रेसने राज्यातील महिलांसाठी “माई-बहन मान योजना” या नावाने एक मोहीम सुरू केली असून, त्याअंतर्गत गरजू महिलांना मोफत सॅनिटरी नॅपकीन वाटले जात आहेत. विशेष म्हणजे या नॅपकीनच्या पाकिटांवर काँग्रेस नेते राहुल गांधी यांचा मोठा फोटो छापण्यात आला आहे. या गोष्टीवरून विरोधकांनी काँग्रेसवर जोरदार टीका केली असून, याला राजकीय प्रचाराचा एक प्रकार मानले जात आहे.
या योजनेचा उद्देश महिलांच्या आरोग्यविषयक गरजा पूर्ण करणे आणि त्यांना मासिक पाळीच्या काळात स्वच्छता राखण्यासाठी आवश्यक सुविधा पुरवणे हा आहे. काँग्रेसने या योजनेअंतर्गत ५ लाख महिलांना मोफत सॅनिटरी नॅपकीन वाटण्याचे लक्ष्य ठेवले आहे. यासोबतच, निवडणुकीनंतर सत्तेवर आल्यास महिलांना दरमहा ₹२५०० मानधन देण्याचे आश्वासनही काँग्रेसने दिले आहे. मात्र, या सॅनिटरी नॅपकीनच्या पाकिटांवर राहुल गांधी यांचा फोटो छापल्यामुळे राजकीय वातावरण तापले आहे.
भाजप आणि जदयू या एनडीए घटक पक्षांनी या उपक्रमावर तीव्र टीका केली आहे. भाजपने याला “महिलांचा अपमान” असे संबोधले असून, काँग्रेसवर महिलांच्या गरजांचा वापर केवळ प्रचारासाठी केल्याचा आरोप केला आहे. जदयूनेही काँग्रेसवर “राजकीय वैचारिक दिवाळखोरी” असल्याचे सांगितले आहे. काही नेत्यांनी प्रश्न उपस्थित केला की, जर महिलांचा सन्मान करायचा असेल, तर त्यांच्या प्रतिनिधित्वासाठी महिला नेत्यांचे फोटो का नाहीत?
या टीकेला उत्तर देताना काँग्रेस नेत्या अलका लांबा यांनी म्हटले की, “खरा प्रश्न राहुल गांधींचा फोटो नाही, तर आजही बिहारमधील मुली मासिक पाळीच्या वेळी कापड वापरण्यास का मजबूर आहेत, हा आहे.” त्यांनी विरोधकांवर टीका करताना सांगितले की, महिलांच्या आरोग्याच्या मुद्द्यावरून राजकारण न करता त्यावर उपाय शोधणे गरजेचे आहे. दरम्यान, वाद वाढल्यानंतर काही ठिकाणी प्रियंका गांधी यांचा फोटो लावण्यात आल्याचेही वृत्त आहे.
या प्रकरणामुळे निवडणूक प्रचाराच्या मर्यादा, महिलांच्या आरोग्यविषयक गरजा आणि राजकीय प्रचाराच्या स्वरूपावर व्यापक चर्चा सुरू झाली आहे. एकीकडे काँग्रेसने महिलांच्या सक्षमीकरणाचा मुद्दा उचलला असला, तरी त्याच्या सादरीकरणावरून निर्माण झालेला वाद निवडणूकपूर्व वातावरणात नवा रंग भरतो आहे.
