Maruti च्या पहिल्या EV ला पंतप्रधानांनी दाखवला हिरवा झेंडा

हंसलपूर, दि. २६ : पंतप्रधान नरेंद्र मोदी यांनी आज गुजरातमधील हंसलपूर येथे मारुती सुझुकीच्या पहिल्या इलेक्ट्रिक SUV ‘ई-विटारा’ला हिरवा झेंडा दाखवून तिच्या उत्पादनाचा औपचारिक शुभारंभ केला. ही कार पूर्णतः भारतात तयार करण्यात आली असून, युरोप, जपानसह १०० हून अधिक देशांमध्ये तिची निर्यात केली जाणार आहे. या कार्यक्रमात पंतप्रधानांनी हायब्रिड बॅटरी इलेक्ट्रोड्सच्या स्थानिक उत्पादनासाठी नवीन असेंब्ली लाइनचे उद्घाटनही केले, ज्यामुळे भारताच्या स्वच्छ ऊर्जा आणि आत्मनिर्भरतेच्या दिशेने महत्त्वाचे पाऊल टाकले गेले आहे.

‘ई-विटारा’ ही मारुती सुझुकीची पहिली इलेक्ट्रिक कार असून ती हार्टेक्ट-ई प्लॅटफॉर्मवर विकसित करण्यात आली आहे. टोयोटासोबतच्या सहकार्यामुळे या कारमध्ये आधुनिक डिझाइन, एलईडी हेडलाइट्स, १९-इंच काळी चाके, आणि इलेक्ट्रिक सनरूफसारखी वैशिष्ट्ये आहेत. कारमध्ये ४९ किलोवॅट आणि ६१ किलोवॅट क्षमतेचे दोन बॅटरी पॅक पर्याय उपलब्ध असतील, जे एका चार्जमध्ये ५०० किलोमीटरपेक्षा जास्त अंतर पार करू शकतात. सुरक्षेसाठी ६ एअरबॅग्ज, ३६०-डिग्री कॅमेरा आणि इलेक्ट्रॉनिक पार्किंग ब्रेक यांसारखी वैशिष्ट्येही देण्यात आली आहेत.

हंसलपूर येथील सुझुकी मोटर गुजरात (एसएमजी) प्लांटमध्ये या कारचे उत्पादन सुरू झाले असून, या प्लांटची वार्षिक उत्पादन क्षमता सुमारे ७.५ लाख युनिट्स आहे. मारुती सुझुकीने २०२६ पर्यंत ६७,००० इलेक्ट्रिक वाहनांचे उत्पादन करण्याचे लक्ष्य ठेवले आहे, ज्यातील मोठा भाग निर्यात केला जाणार आहे. या प्रकल्पामुळे ‘मेक इन इंडिया’ मोहिमेला चालना मिळणार असून, भारताच्या जागतिक बाजारपेठेतील स्थानाला बळकटी मिळणार आहे.

ही कार भारतीय बाजारात MG ZS EV, Tata Curve EV, Hyundai Creta EV आणि Mahindra BE05 यांसारख्या इलेक्ट्रिक SUV गाड्यांशी स्पर्धा करणार आहे. तिची किंमत २० लाख रुपयांपासून सुरू होऊन ३० लाख रुपयांपर्यंत जाऊ शकते, विविध बॅटरी आणि ड्राइव्ह पर्यायांनुसार.

SL/ML/SL