पेन्शनधारकांना आता पोस्टमन देणार जीवन प्रमाणपत्रे
मुंबई, दि. १६ : निवृत्तीवेतनधारकांना आता जीवन प्रमाणपत्र सादर करण्यासाठी बँक शाखा किंवा ईपीएफओ कार्यालयात जाण्याची आवश्यकता राहणार नाही. यासाठी, इंडिया पोस्ट पेमेंट बँक (IPPB) आणि ईपीएफओ यांच्यात एक करार झाला आहे. याअंतर्गत पोस्टमन आणि ग्रामीण टपाल कर्मचारी घरोघरी जाऊन डिजिटल जीवन प्रमाणपत्रे तयार करतील.
पोस्टमन थेट पेन्शनधारकाच्या घरी भेट देईल. प्रथम, ते पेन्शन पेमेंट ऑर्डर (पीपीओ) आणि आधारचे तपशील जुळवतील. त्यानंतर, ते फेस ऑथेंटिकेशन टेक्नॉलॉजी (एफएटी) वापरून डीएलसी जनरेट करतील. फेस ऑथेंटिकेशन उपलब्ध नसेल, तर ते बायोमेट्रिक फिंगरप्रिंट वापरतील. यशस्वी पडताळणीनंतर पेन्शनधारकाला एक एसएमएस मिळेल आणि डीएलसी जीवन प्रमाण पोर्टलवर उपलब्ध असेल. डिजिटल जीवन प्रमाणपत्रे जारी करण्याचा संपूर्ण खर्च ईपीएफओ उचलेल, ज्यामुळे पेन्शनधारकांसाठी ही सेवा पूर्णपणे मोफत होईल. पेन्शनधारकांची इच्छा असेल, तर ते आयपीपीबी कस्टमर केअर (०३३-२२०२९०००) वर कॉल करून डोअरस्टेप भेटीची विनंती करू शकतात.
ईपीएफओने स्मार्टफोन असलेल्या पेन्शनधारकांना जीवन प्रमाण किंवा उमंग अॅप वापरून स्वतःचे डीएलसी तयार करण्याचा सल्ला दिला आहे. ज्यांना हे कठीण वाटते ते या मोफत सेवेचा लाभ घेऊ शकतात. या सेवेचा लाभ घेण्यासाठी पेन्शनधारकांना आयपीपीबी मोबाइल अॅप किंवा टोल-फ्री क्रमांकाद्वारे स्लॉट बुक करावा लागेल. त्यानंतर पोस्टमन नियोजित वेळी त्यांच्या घरी पोहोचतील आणि आधार-बायोमेट्रिक पडताळणीद्वारे डिजिटल जीवन प्रमाणपत्र तयार करतील.
SL/ML/SL
