उत्तर कोरियाकडून 10 बॅलेस्टिक क्षेपणास्त्रांची चाचणी

प्योंगयांग, दि. ३१ (एमएमसी न्यूज नेटवर्क) : उत्तर कोरियाने काल पूर्व समुद्रात (जपान समुद्र) 10 बॅलेस्टिक क्षेपणास्त्रांची चाचणी घेतली. काल सकाळी 6.14 वाजता उत्तर कोरियाच्या सुनान भागातून क्षेपणास्त्रे डागण्यात आली. संयुक्त राष्ट्रसंघाने उत्तर कोरियावर अण्वस्त्र आणि बॅलिस्टिक शस्त्रांच्या चाचणीबाबत निर्बंध लादले आहेत. तरीही तो सातत्याने क्षेपणास्त्राच्या चाचण्या करत आहे. दक्षिण कोरिया आणि जपानच्या सैन्याने या चाचणी बाबत तीव्र निषेध व्यक्त केला आहे. उत्तर कोरियाची ही कृती कोरियन द्वीपकल्पातील सुरक्षा आणि शांततेला धोका असल्याचे दक्षिण कोरियाच्या लष्कराने म्हटले आहे.

जपानच्या संरक्षण मंत्रालयाने म्हटले आहे की, आम्ही आमच्या सागरी सीमांची सुरक्षा वाढवली आहे. जपानमध्ये येणाऱ्या जहाजांचा शोध घेतला जात आहे. दक्षिण कोरिया अमेरिका आणि जपानसोबत संयुक्त लष्करी सरावासाठी बोलणी करत असताना उत्तर कोरियाने ही चाचणी केली आहे.

या क्षेपणास्त्रांच्या प्रक्षेपणाच्या केवळ 3 दिवस आधी उत्तर कोरियाने आपला दुसरा गुप्तचर उपग्रह प्रक्षेपित करण्याचा प्रयत्न केला होता, तो अयशस्वी झाला. उपग्रह घेऊन जाणाऱ्या रॉकेटचा हवेतच स्फोट झाला. उत्तर कोरियाच्या उपग्रह प्रक्षेपणाच्या काही तास आधी, दक्षिण कोरियाने दोन्ही देशांच्या सीमेजवळ 20 लढाऊ विमानांसह युद्धाभ्यास केले होते. याच्या एक दिवस आधी उत्तर कोरियाने दक्षिण कोरियाचे लक्ष वळवण्यासाठी दक्षिण कोरियाच्या सीमेवर कचऱ्याने भरलेले फुगे उडवले होते. तसेच उत्तर कोरियाचे नेते किम जोंग उन यांनी दक्षिण कोरियावर कठोर कारवाई करण्याचा इशारा दिला आहे.

अण्वस्त्रधारी देश झाल्यापासून उत्तर कोरियाशी युद्ध पुकारलेल्या दक्षिण कोरियाच्या सुरक्षेला धोका निर्माण झाला आहे. हे पाहता अमेरिका आणि दक्षिण कोरिया संरक्षण सहकार्य वाढवत आहेत. त्यासाठी लष्करी सराव केला जात आहे. त्याचबरोबर 27 हजार अमेरिकन सैनिक दक्षिण कोरियात तैनात आहेत.

SL/ML/SL

31 May 2024