नितीन गडकरी यांची उमेदवारी दाखल
नागपूर, दि. २७ (एमएमसी न्यूज नेटवर्क) नागपूर लोकसभा मतदार संघामधून भाजप तसेच महायुतीचे उमेदवार नितीन गडकरी यासोबतच रामटेक लोकसभा मतदार संघातून शिवसेना आणि महायुतीचे उमेदवार राजू पारवे यांनी आपला उमेदवारी अर्ज आज नागपूर जिल्हाधिकारी कार्यालयामध्ये सादर केला . याप्रसंगी मुख्यमंत्री एकनाथ शिंदे उपमुख्यमंत्री देवेंद्र फडणवीस भाजपचे प्रदेशाध्यक्ष चंद्रशेखर बावनकुळे, राष्ट्रवादीचे नेते प्रफुल्ल पटेल, प्रा जोगेंद्र कवाडे आदी नेते प्रामुख्याने उपस्थित होते.
पारवे यांनी नुकताच काँग्रेस पक्षाचा राजीनामा देऊन शिवसेनेच्या शिंदे गटात प्रवेश केला आहे. नामांकन अर्ज भरण्यापूर्वी गडकरी यांनी नागपूरच्या संविधान चौकात डॉ. बाबासाहेब आंबेडकर यांच्या पुतळ्याला अभिवादन केले आणि आकाशवाणी चौकात एका जाहीर सभेलाही संबोधित केले.नागपूर मधून 75 टक्के मतदान करून पाच लाखाच्या मताधिक्याने मला नागपूरची जनता निवडून देईल असा विश्वास भाजपचे नेते आणि केंद्रीय मंत्री नितीन गडकरी यांनी यावेळी व्यक्त केला.
नितीन गडकरी हे केवळ नागपूरचे नेते नसून राष्ट्रीय नेते आहे तर त्यांचा सन्मान रेकॉर्ड ब्रेक – विक्रमी मताधिक्याने झाला पाहिजे असे देवेंद्र फडणवीस यांनी सांगितले. भाजपचे नेते आणि केंद्रीय मंत्री नितीन गडकरी यांच्या नागपूर लोकसभा मतदार संघासाठी नामांकन भरण्यापूर्वीच्या जाहीर सभेला संबोधित करताना ते बोलत होते. राजू पारवेंच्या रूपाने एक युवा तडफदार नेतृत्व शिवसेनेच्या धनुष्यबाणावर रामटेक लोकसभा मतदारसंघ लढविण्यासाठी सज्ज आहे असेही फडणवीस म्हणाले.
ML/ML/SL
27 March 2024
