नॅशनल इन्स्टिट्यूट ऑफ नॅचरोपॅथी (NIN) येथे स्वातंत्र्य दिन साजरा.
पुणे, दि १५: “बापू भवन, निसर्ग ग्राम आणि निसर्ग साधना आरोग्य केंद्र येथे कार्यरत नॅशनल इन्स्टिट्यूट ऑफ नॅचरोपॅथी (NIN) मध्ये ७९ वा स्वातंत्र्य दिन मोठ्या उत्साहात साजरा करण्यात आला.
कार्यक्रमाची सुरुवात ध्वजारोहण सोहळ्याने झाली, ज्यामुळे परिसरात देशभक्तीचे वातावरण निर्माण झाले. देशभक्तिपर गीते, प्रेरणादायी भाषणे आणि शांतता, आरोग्य व राष्ट्रीय ऐक्य यांना प्रोत्साहन देणारे सांस्कृतिक कार्यक्रम सादर करण्यात आले, ज्यातून दिवसाचा आत्मा प्रतिबिंबित झाला.
समारंभाला ‘एनआयएन’चे मान्यवर सदस्य, अधिकारी, विद्यार्थी, डॉक्टर, कर्मचारी व आरोग्यप्रेमी उपस्थित होते. ‘एनआयएन’च्या संचालिका प्रा. डॉ. के. सत्यलक्ष्मी यांनी मान्यवर आणि उपस्थितांचे स्वागत केले. आपल्या भाषणात त्यांनी भारताच्या स्वातंत्र्य, स्वराज्य आणि समृद्धीकडे झालेल्या प्रवासाच्या संदर्भात स्वातंत्र्य दिनाचे महत्त्व अधोरेखित केले. तसेच निसर्ग ग्राम व निसर्ग साधना आरोग्य केंद्र यांसारख्या संस्थांची निसर्गोपचार, योग आणि पारंपरिक उपचार पद्धती आधुनिक जीवनशैलीत समाविष्ट करून सर्वांगीण आरोग्य प्रोत्साहनातील महत्त्वाची भूमिका स्पष्ट केली. त्यांच्या विचारांनी उपस्थितांना वैयक्तिक व राष्ट्रीय कल्याणासाठी कार्यरत राहण्याची प्रेरणा मिळाली.
नॅशनल इन्स्टिट्यूट ऑफ नॅचरोपॅथीचे प्रशासकीय अधिकारी श्री. मंदार देशपांडे यांनीही या वेळी भाषण केले. त्यांनी सर्वांना निःस्वार्थ भावनेने व समर्पणाने समाजसेवेसाठी कटिबद्ध राहण्याचे आवाहन केले.
या निमित्ताने डॉक्टर, थेरपिस्ट आणि कर्मचारी यांना त्यांच्या समर्पण व सेवेसाठी प्रशस्तीपत्र प्रदान करण्यात आले.
सांस्कृतिक कार्यक्रमांमधून भारताची समृद्ध परंपरा, देशभक्तिपर गीते आणि इतर सादरीकरणे यांद्वारे अभिमान व आनंदाची अनुभूती देण्यात आली. याशिवाय, शारीरिक तंदुरुस्ती व टीमवर्कला प्रोत्साहन देण्यासाठी विविध क्रीडा उपक्रमांचे आयोजन करण्यात आले. कर्मचारी, विद्यार्थी व डॉक्टर यांच्या मैत्रीपूर्ण क्रीडा स्पर्धांमधून आरोग्य हा सर्वांगीण कल्याणाचा एक महत्त्वाचा घटक असल्याचा संदेश देण्यात आला.KK/ML/MS
