महिला सुरक्षेसाठी मुंबई मनपाचे विशेष मोबाईल App
मुंबई, दि. ४ (एमएमसी न्यूज नेटवर्क) :
महानगरी मुंबईच्या वाढत्या विस्ताराबरोबरच येथील सुरक्षा व्यवस्थांवर ताण येत आहे. त्यातच गुन्हेगारीचे प्रमाण वाढल्याने महिलांच्या सुरक्षेचा प्रश्न ऐरणीवर आला आहे. यावर उपाययोजना करण्यासाठी मुंबई महापालिकेने यंदाच्या २०२४-२५च्या अर्थसंकल्पीय अंदाजात महिला सुरक्षेवर अधिक भर देण्याचा निर्णय घेतला आहे. महिला सुरक्षेसाठी विशेष मोहीम हाती घेण्यात येणार असून या मोहिमेअंतर्गत मोबाइल ॲप तयार केले जाणार असल्याची माहिती मुंबई महापालिकेने दिली. संकटात असलेली कोणतीही महिला या ॲपच्या मदतीने पोलिस, पालिका, सामाजिक संस्थांशी संपर्क साधून मदत मागू शकेल. मोबाइल अॅप पोलिस तसेच पालिका यंत्रणेशी जोडले जाणार आहे. सन २०२४-२५मध्ये महिला सुरक्षेची ही सुविधा उपलब्ध होईल. या मोहिमेच्या प्रभावी अंमलबजावणीकरीता मुंबई महापालिकेने १०० कोटी रुपये इतकी तरतूद केली आहे.
महिलांना कौटुंबिक हिंसाचारासह विनयभंग, छेडछाड यासारख्या विविध गुन्हेगारी कृत्यांना किंवा समस्यांना तोंड द्यावे लागते. महिलांविषयक याच गुन्ह्यांची नोंद मोठ्या प्रमाणात होत असते. त्यापाठोपाठ चोरीसाठी महिलांना जबर मारहाण करण्याच्याही घटना घडतात. या पार्श्वभूमीवर सुरक्षेबरोबरच महिलांना अत्यंत कठीण परिस्थितीत लागणारी मदत तत्काळ मिळावी यासाठी मुंबई महापालिकेने मोबाइल ॲप सुरू करण्याचा निर्णय घेतल्याची माहिती पालिका आयुक्त इक्बालसिंह चहल यांनी दिली. मुंबई महिला सुरक्षा मोहिमेंतर्गत हे ॲप तयार केले जाणार आहे. पोलिस, होमगार्ड, सामाजिक संस्था आदींचा यात समावेश केला जाणार आहे. आपत्कालीन परिस्थितीत महिलांना ॲपची मदत मिळेल.
महिलांना कोणतीही समस्या असल्यास त्या तत्काळ या ॲपद्वारे पालिका, पोलिस किंवा अन्य यंत्रणांकडून मदत मागू शकतात. अॅप तयार केल्यानंतर येणाऱ्या तक्रारींची दखल घेणे आणि त्या सोडवण्यासाठी संबंधित यंत्रणांशी संपर्क साधणे यासाठी नियंत्रण कक्षही स्थापन केला जाणार असल्याचे चहल म्हणाले. महिलेने संपर्क साधल्यानंतर तत्काळ मदत मिळावी, यासाठी पोलिसांच्या मदतीने गस्ती पथक तैनात केले जाणार आहे.या ॲपच्या डेव्हलपमेंटचे काम सध्या सुरु असून येत्या काही महिन्यात ते उपलब्ध होणार आहे.
SL/KA/SL
4 Feb. 2024
