पहलगाम हल्ल्यात मदत करणाऱ्याला अटक
जम्मू आणि काश्मीरमधील पहलगाम येथे काही दिवसांपूर्वी झालेल्या भयंकर दहशतवादी हल्ल्यात २६ निष्पाप नागरिकांचा मृत्यू झाला होता. या घटनेने संपूर्ण देशात खळबळ उडवली होती. आता या प्रकरणात जम्मू आणि काश्मीर पोलिसांना मोठे यश मिळाले असून, हल्ल्याला मदत करणाऱ्या एका संशयिताला अटक करण्यात आली आहे.
अटक करण्यात आलेल्या व्यक्तीचे नाव मोहम्मद युसूफ कटारिया असून, तो लष्कर-ए-तैयबा या दहशतवादी संघटनेच्या TRF (The Resistance Front) गटाचा सक्रिय सदस्य असल्याचे उघड झाले आहे. पोलिसांच्या तपासात कटारियाने हल्लेखोरांना रसद पुरवली होती आणि हल्ल्याची योजना आखण्यातही मदत केली होती. मात्र, तो प्रत्यक्ष हल्ल्यात सहभागी नव्हता. तरीही त्याची भूमिका अत्यंत महत्त्वाची असल्याने पोलिस त्याचा शोध घेत होते.
श्रीनगर पोलिस आणि जम्मू-काश्मीर पोलिसांनी संयुक्त कारवाई करत ब्रिनल-लामा परिसरातून मोहम्मद युसूफ कटारियाला अटक केली. तो कुलगाम जिल्ह्यातील डोंगराळ भागात राहणाऱ्या एका जमातीचा सदस्य आहे. या भागात लष्कर-ए-तैयबाचे दहशतवादी नेहमी सक्रिय असतात, त्यामुळे कटारियाचा या गटाशी संबंध असल्याचा संशय आधीपासूनच होता.
कटारियाच्या अटकेनंतर आता त्याची सखोल चौकशी सुरू करण्यात आली आहे. या चौकशीतून हल्ल्याच्या पार्श्वभूमीबाबत आणि TRF च्या हालचालींबाबत महत्त्वाची माहिती मिळण्याची शक्यता वर्तवली जात आहे. पोलिसांकडून या प्रकरणात आणखी काही अटक होण्याची शक्यता असून, संपूर्ण दहशतवादी नेटवर्कचा पर्दाफाश होण्याची आशा व्यक्त केली जात आहे.
या कारवाईमुळे जम्मू आणि काश्मीरमधील सुरक्षेच्या दृष्टीने महत्त्वाचा टप्पा गाठण्यात पोलिसांना यश आले आहे. नागरिकांच्या सुरक्षेसाठी पोलिस यंत्रणा सतर्क असून, अशा प्रकारच्या दहशतवादी कारवायांना आळा घालण्यासाठी प्रयत्न सुरू आहेत.
