बोरीवली पूर्व येथे २६ तारखेपासून मालवणी महोत्सव

मुंबई, दि. ७ : मागाठाणे मित्र मंडळ आणि शिवसेना शाखा क्रमांक १४ तसेच १२ च्या संयुक्त विद्यमाने रविवार, २६ ऑक्टोबर २०२५ पासून बोरीवली पूर्व येथील जय महाराष्ट्र नगर येथील कै. अनंतराव भोसले मैदानावर मालवणी महोत्सवाचे आयोजन करण्यात आले आहे. परंपरेप्रमाणे सिंधुदुर्ग जिल्ह्यातील मालवण तालुक्यातील पेंडूर येथील श्री देव वेताळ मंदिराच्या प्रतिकृती आणि बालनगरी व बाजारपेठेचे महा आरती तसेच पारंपारिक गाऱ्हाणे घालून उद्घाटन करण्यात येणार आहे. या मालवणी महोत्सवाचे यंदाचे २८ वे वर्ष असून रविवार, २ नोव्हेंबर २०२५ पर्यंत कोकणी संस्कृती आणि खाद्यपदार्थांची मेजवानी उपलब्ध होणार आहे. रोज सायंकाळी ७ वाजतां श्री देव वेताळाची वाजंत्री तरंगासह पालखी आणि रात्री ८ वाजतां दशावतार नाट्यप्रयोग सादर करण्यात येणार आहेत. या मालवणी महोत्सवाचा कै. अनंतराव भोसले मैदानावर शिवसेना उपनेते श्री. विनोद घोसाळकर आणि माजी आमदार विलास पोतनीस यांच्या शुभहस्ते श्रीफळ वाढवून मुहूर्त करण्यात आला आहे, अशी माहिती उत्सव प्रमुख नंदकुमार मोरे यांनी दिली.ML/ML/MS