या कालावधीत होणार महाराष्ट्र केसरी कुस्ती स्पर्धा, विजेत्याला मिळणार महिंद्रा थार
पुणे, दि. ४ (एमएमसी न्यूज नेटवर्क) : ७ ते १० नोव्हेंबर २०२३ दरम्यान फुलगाव येथील नेताजी सुभाषचंद्र बोस सैनिकी शाळेत ६६ वी वरिष्ठ राज्य अजिंक्यपद, महाराष्ट्र केसरी कुस्ती स्पर्धा पार पडणार आहे. या स्पर्धेचे आयोजन भारतीय कुस्ती महासंघ आणि महाराष्ट्र राज्य कुस्तीगीर संघाच्या वतीने करण्यात आले आहे. या स्पर्धेत महाराष्ट्र केसरी होणाऱ्या विजेत्या कुस्तीगीरला महिंद्रा थार तसेच उपमहाराष्ट्र केसरी कुस्तीगीराला ट्रॅक्टर असे बक्षीस दिले जाणार आहे, अशी माहिती स्पर्धेचे स्वागताध्यक्ष पुणे जिल्हा मध्यवर्ती बँकेचे सदस्य प्रदीप कंद यांनी पत्रकार परिषदेत दिली.
कंद म्हणाले की, महाराष्ट्र केसरी स्पर्धेचे उद्घाटन ७ नोव्हेंबर रोजी सायंकाळी ५ वाजता राज्याचे उच्च व तंत्र शिक्षण मंत्री चंद्रकांत पाटील, भाजपा प्रदेशाध्यक्ष चंद्रशेखर बावनकुळे, महाराष्ट्र राज्य कुस्तीगीर संघाचे अध्यक्ष खासदार रामदास तडस आणि उपाध्यक्ष मुरलीधर मोहोळ यांच्या उपस्थितीमध्ये होणार. तर स्पर्धेच बक्षीस वितरण १० नोव्हेंबर रोजी मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार यांच्या हस्ते होणार. सुभाषचंद्र बोस सैनिकी शाळेमध्ये साधारण ५० हजार प्रेक्षक क्षमता असलेले स्टेडीयम उभारण्यात आल्याचे त्यांनी सांगितले.
या स्पर्धेत ३६ जिल्हा आणि ६ महानगरपालिका असे एकूण ४२ संघ सहभागी होणार आहेत.
SL/KA/SL
4 Nov. 2023
