महाराष्ट्राच्या हास्यजत्रेची लंडनवारी
मुंबई, दि. २२ (एमएमसी न्यूज नेटवर्क) : सोनी मराठी चॅनलवरील देशभरातील मराठी रसिकांचा आवडता मराठी कॉमेडी शो आता लंडन दौऱ्यावर निघाला आहे, ‘महाराष्ट्राची हास्यजत्रा’ कार्यक्रमाचे शो लंडनमध्ये येत्या २३ आणि २४ नोव्हेंबरला होणार आहेत. हा कार्यक्रम प्रेक्षकांना लाइव्ह, बेक आणि शॉ थिएटरमध्ये पाहायला मिळणार आहे. यासाठी बुकिंग आधीच सुरू करण्यात आलं होतं. लंडनला निघण्यापूर्वीचा मुंबई विमानतळावरचा या सगळ्या कलाकारांचा एक फोटो सध्या चर्चेत आला आहे.
प्रसाद खांडेकरने ‘महाराष्ट्राची हास्यजत्रा लाइव्ह इन लंडन’ असं कॅप्शन देत सर्व कलाकारांबरोबरचा एक खास सेल्फी सोशल मीडियावर शेअर केला आहे. तर, आणखी एका फोटोला अभिनेत्याने ‘चलो लंडन’ असं कॅप्शन दिलं आहे. प्रसादसह, नम्रता संभेराव, प्रभाकर मोरे, सचिन गोस्वामी, वनिता खरात, अरुण कदम, समीर चौघुले, चेतना भट, प्रियदर्शिनी इंदलकर, ओंकार राऊत, शिवाली परब, प्रथमेश शिवलकर असे सगळे दमदार कलाकार या फोटोमध्ये एकत्र दिसत आहेत.
हे सगळे विनोदवीर लंडनमध्ये जाऊन काय-काय धमाल करणार हे पाहणं महत्त्वाचं ठरणार आहे. याशिवाय हास्यजत्रेचं नवीन पर्व येत्या २ डिसेंबरपासून प्रेक्षकांच्या भेटीला येणार आहे.
22 Nov. 2024
