हवेची गुणवत्ता जाणून घेणे हा नागरिकांचा अधिकार
मुंबई, दि. २७ : मुंबई उच्च न्यायालयाने नागरिकांना हवेची गुणवत्ता जाणून घेण्याचा पूर्ण अधिकार असल्याचे स्पष्ट करत, हवेच्या गुणवत्तेशी संबंधित सर्व आकडेवारी सार्वजनिक संकेतस्थळावर प्रदर्शित करण्याचे आदेश दिले आहेत. सुमोटो याचिकेवरील सुनावणीदरम्यान न्यायालयाने प्रशासनाच्या भूमिकेवर गंभीर निरीक्षणे नोंदवली. अॅमिकस क्युरी यांनी दिलेल्या माहितीनुसार, जानेवारीतील पहिल्या २५ दिवसांपैकी तब्बल १८ दिवस मुंबईची हवा खराब दर्जाची होती. त्यांनी अहवालाचा दाखला देत सांगितले की, भारतातील प्रत्येक पाचपैकी एक मृत्यू हा खराब हवेमुळे होत असून, अर्थव्यवस्थेवरही प्रदूषणाचा गंभीर परिणाम होत आहे. परिस्थितीचे वर्णन करताना त्यांनी “आपण मिनी भोपाळमध्ये राहत आहोत” असे तीव्र शब्दांत मत व्यक्त केले.
न्यायालयाने नमूद केले की, मुंबई महापालिकेने काही प्रमाणात प्रयत्न केले असले तरी कारखाने, बांधकामे आणि वाहनसंख्या यामुळे प्रदूषणावर नियंत्रण दिसून येत नाही. या समस्येवर मात करण्यासाठी कायमस्वरूपी यंत्रणा आवश्यक असल्याचे सांगत, गरज भासल्यास नवीन समित्या स्थापन करण्याचे संकेत दिले. दरम्यान, राज्याच्या मुख्य सचिवांना प्रतिवादी करण्याची मागणी न्यायालयाने फेटाळली असून, पुढील सुनावणी २९ तारखेला होणार आहे.
SL/ML/SL
