दुष्काळी स्थिती पाहता अग्रीम पीकविमा झाला मंजूर
बीड, दि. ३१( एमएमसी न्यूज नेटवर्क) : राज्याचे कृषिमंत्री धनंजय मुंडे यांनी तीन दिवसांपूर्वी संभाजीनगर येथे मराठवाड्यातील दुष्काळ सदस्य परिस्थितीच्या आढाव्यामध्ये मराठवाड्यातील जिल्ह्यांना दिलेल्या आदेशाचे बीड जिल्हा प्रशासनाने तंतोतंत पालन केले असून, बीड जिल्ह्यातील सर्व 87 महसुली मंडळांमध्ये अग्रीम पीकविमा देण्याचे मान्य करत संबंधित पीकविमा कंपनीस अग्रीम तातडीने वितरित करण्याचे निर्देश दिले आहेत.
बीड जिल्ह्यातील विशेषतः सोयाबीन उत्पादनाच्या बाबतीत पावसात दीर्घकालीन खंड पडल्यामुळे शेतकरी संकटात आले आहेत. बीड जिल्ह्यातील सर्व 11 तालुक्यांमध्ये पावसाच्या खंडाने दुष्काळ सदस्य परिस्थिती असल्यामुळे कृषी मंत्री धनंजय मुंडे यांनी तातडीने अंतरिम दिलासा म्हणून शेतकऱ्यांना अग्रीम पीक विमा मिळवून देण्यासाठी सात दिवसांच्या आत महसूल, कृषी आणि पीक विमा कंपनीने एकत्रित सर्वे करून अहवाल सादर करावा आणि अग्रीमे विमा देण्याचे निर्णय घ्यावा असे निर्देश दिले होते.
त्यानुसार बीडच्या जिल्हाधिकारी दीपा मुधोळ – मुंडे यांनी आज अधिसूचना निर्गमित केली असून महसूल, कृषी , पीक विमा कंपनीने निर्देशित केलेल्या सर्व 87 महसुली मंडळांमध्ये सोयाबीन, उडीद आणि मूग या पिकांचे सर्वेक्षण करावे, या सर्व महसुली मंडळांमध्ये पावसाचे प्रमाण कमी असल्यामुळे संभाव्य नुकसान हे सरासरी उत्पन्नाच्या 50 टक्के पेक्षा अधिक असल्याने निकषानुसार ही सर्वच्या सर्व महसूल मंडळे अग्रीम पीक विम्यास पात्र आहेत. या सर्व महसूल मंडळांमध्ये तातडीने अग्रीम पीक विमा देण्यात यावा, अशा पद्धतीचे आदेश आज निर्गमित केले आहेत.
धनंजय मुंडे यांच्या या तातडीच्या निर्णयामुळे 87 महसूल मंडळातील सोयाबीन, मूग , उडीद उत्पादक शेतकऱ्यांना 25% अग्रीम विमा एक महिन्याच्या आत मिळेल, हे आता निश्चित झाले असून, या कठीण काळात हा जिल्ह्यातील शेतकऱ्यांसाठी मोठा दिलासा ठरणार आहे.
ML/KA/SL
31 Aug 2023
