ऑगस्टमध्ये GST तून विक्रमी महसूल संकलन
मुंबई : ऑगस्ट २०२५ मध्ये वस्तू आणि सेवा कर (GST) मधून सरकारला घसघशीत महसूल मिळाला आहे. सरकारने ऑगस्ट महिन्यातील वस्तू आणि सेवा कर (GST) संकलनाची आकडेवारी जाहीर केली आहे. ऑगस्ट २०२५ मध्ये देशातील वस्तू आणि सेवा कर संकलन १.८६ लाख कोटी रुपये राहिले आहे. हा आकडा गेल्या वर्षीच्या याच कालावधीपेक्षा ६.५ टक्के जास्त आहे. गेल्या महिन्यात म्हणजेच जुलै २०२५ मध्ये GST संकलन १.९६ लाख कोटी रुपये होते. तर एप्रिल २०२५ मध्ये २.३७ लाख कोटी रुपयांच्या विक्रमी उच्चांकावर पोहोचले.
ऑगस्ट महिन्यात देशांतर्गत GST संकलन ९.६ टक्क्यांनी वाढून १.३७ लाख कोटी रुपये झाले आहे. आयातीतून मिळणारा महसूल १.२ टक्क्यांनी घटून ४९३५४ कोटी रुपये झाला आहे. ऑगस्टमध्ये सेस संकलन १२१९९ कोटी रुपये नोंदवले गेले. परतफेडीच्या बाबतीत एकूण देयक १९.९ टक्क्यांनी घटून १९३५९ कोटी रुपये झाले, ज्यामुळे ऑगस्टचा निव्वळ जीएसटी महसूल १०.७ टक्क्यांनी वाढून १.६७ लाख कोटी रुपये झाला.
सलग आठव्या महिन्यात GST संकलन १.८ लाख कोटी रुपयांच्या पातळीपेक्षा जास्त राहिले. मात्र पहिल्या तिमाहीच्या तुलनेत विकास दर मंदावला आहे. दरम्यान, भारतीय अर्थव्यवस्थेने अपेक्षेपेक्षा चांगली कामगिरी केली आणि ७.८ टक्के जीडीपी वाढ नोंदवली.
