लंडनमध्ये फेटाळला फरार नीरव मोदीचा जामीन अर्ज
पीएनबी घोटाळा प्रकरणातील मुख्य आरोपी फरार नीरव मोदीचा जामीन अर्ज फेटाळण्यात आला आहे. लंडनमधील किंग्ज बेंच डिव्हिजन हायकोर्टाने सुनावणीनंतर तो फेटाळला. भारताच्या वतीने सीबीआयच्या वकिलाने नीरवच्या युक्तिवादांना विरोध केला होता.
नीरव मोदीवर पंजाब नॅशनल बँकेकडून (पीएनबी) कर्ज घेऊन सुमारे १४ हजार कोटी रुपयांची फसवणूक केल्याचा आरोप आहे. घोटाळा उघडकीस आल्यानंतर, तो जानेवारी २०१८ मध्ये देश सोडून पळून गेला. नीरवला १९ मार्च २०१९ रोजी नैऋत्य लंडनमधून अटक करण्यात आली. तेव्हापासून तो तिथे तुरुंगात आहे.
नीरवविरुद्ध भारतात फसवणुकीचे तीन गुन्हे दाखल आहेत. पंजाब नॅशनल बँकेतील (पीएनबी) फसवणुकीचा सीबीआय खटला. दुसरे म्हणजे, पीएनबी प्रकरण हे मनी लाँड्रिंगचे प्रकरण आहे आणि तिसरे म्हणजे, सीबीआयच्या कारवाईत पुरावे आणि साक्षीदारांशी छेडछाड केल्याचा खटला आहे.
फेब्रुवारी २०२१ मध्ये, नीरवच्या प्रत्यार्पणाची सुनावणी ब्रिटनच्या वेस्टमिन्स्टर न्यायालयात झाली. न्यायालयाने नीरवला भारतात पाठवण्याची परवानगीही दिली होती. यानंतर, १५ एप्रिल २०२१ रोजी ब्रिटिश गृहसचिव प्रीती पटेल यांनीही नीरवच्या प्रत्यार्पणाचे आदेश दिले.
यानंतर लंडन हायकोर्टाने नीरवच्या प्रत्यार्पणाचा निर्णय दिला होता. तथापि, इतर कायदेशीर प्रक्रियांमुळे, नीरवचे प्रत्यार्पण अद्याप शक्य झालेले नाही.
घोटाळा कसा झाला ?
हा घोटाळा २०११ मध्ये मुंबईतील पंजाब नॅशनल बॅंकेच्या च्या ब्रॅडी हाऊस शाखेतून सुरू झाला. बनावट लेटर ऑफ अंडरटेकिंग्ज (एलओयू) द्वारे हा घोटाळा करण्यात आला. २०११ ते २०१८ या काळात हजारो कोटी रुपये परदेशी खात्यांमध्ये हस्तांतरित करण्यात आले.
फेब्रुवारी २०१८ च्या पहिल्या आठवड्यात हा घोटाळा उघडकीस आला.
